Саха сирин артыыстара байыаннай чаастарга барыахтара

«Тоҕус киһилээх артыыстар бастакы айар бөлөхтөрө алтынньы 19 күнүгэр Приморьеҕа көтүөҕэ.  Делегацияны өрөспүүбүлүкэтээҕи Театр үлэһиттэрин сойууһун бэрэссэдээтэлэ, Саха театр артыыһа Айаал Аммосов салайар. Бөлөх састаабыгар Саха театр, Эстрада, Үҥкүү, Олоҥхо театрдарын артыыстара, Саха сирин филармониятын солистара киирдилэр», - диэн кэпсээтэ култуура уонна духуобунай сайдыы миниистирин бастакы солбуйааччыта Владислав Левочкин.

Саха сирин Култуураҕа уонна духуобунай сайдыыга министиэристибэтэ икки айар бөлөҕү тэрийдэ, онно, үөһэ этиллибит кэлэктииптэри сэргэ, «БалАнс» ансаамбыл уонна Филармония саксофонистарын бөлөҕө бааллар. Айар бөлөхтөр байыаннай чаастарга, итиэннэ Донецкай уонна Луганскай норуодунай өрөспүүбүлүкэлэргэ барарга бэлэмнэр.

Манна даҕатан эттэххэ, «Симэх» норуот айымньытын киинэ быстах хомуурга ыҥырыллыбыттарга анаан тигиллибит аптечкалары уонна сахалыы харысхаллары артыыстарынан ыытыаҕа. Айар бөлөх сырыытын уһуна – алтынньы 19-24 күннэрэ. Артыыстар Еврейскэй автономнай уобаласка, Приморскай кыраайга, Владивостокка сылдьыахтара.

Култуура тэрилтэлэрэ быстах хомуурга ыҥырыллыбыттары уонна кинилэр дьиэ кэргэттэрин өйүүр үлэтин салгыыр.