Саха сирин Архитектордарын сойууһун бэрэссэдээтэлэ талылынна

Семен Никифоров – 2014 сылтан «Архиграф» бырайыак мастарыскыайын төрүттээччилэриттэн биирдэстэрэ. Итини сэргэ, кини «Утум+» уонна «ЛСТК-проект» бырайыактыыр-тутар фирмаларга архитекторынан үлэлээбитэ.  2017 сыллаахха Саха сирин Архитектордарын сойууһун бэрэссэдээтэлин солбуйааччытынан, онтон 2019 сылтан – бэрэссэдээтэлинэн талыллыбыта.

Бэрэссэдээтэл солбуйааччытынан архитектор Сергей Валериевич Барахов буолла. Кини бас билэр архитектурнай бюролаах, бу иннинэ «LETO» куорат эйгэтин боппуруостарыгар компетенция киинин сүрүннүүр архитекторынан үлэлээбитэ, сойуус олоҕор мэлдьи көхтөөхтүк кыттар.

Маны сэргэ Саха сирин Архитектордарын 8-с съеһигэр бырабылыанньа 4 сыллаах үлэтин отчуотаата, инники былааннары торумнастылар. Ол курдук, кэлэр 2024 сылга сойуус 60 сыллаах үбүлүөйүн бэлиэтиир. Үөрүүлээх тэрээһиннэргэ Арассыыйа бары регионнарын архитектордара ыалдьыттыахтара,  уонна, биллэн турар, Арассыыйа Архитектордарын сойууһун бэрэсидьиэнэ Николай Иванович Шумаков кэлэрэ күүтүллэр. Үбүлүөйдээх сылга «Эйгэ» архитектурнай бириэмийэ ыытыллыаҕа.