Саха сиригэр вакцинация тэтимэ бытаарбыт

От ыйын 1 күнүгэр өрөспүүбүлүкэ баһылыга Айсен Николаев «Саха» НКИХ уонна «Якутия 24» телевизионнай ханаалларыгар ааспыт бэс ыйын түмүктэрин таһаарда. Кини вакцинация хаамыытын, ойуур баһаардарын уонна Казань куоракка сырыытын туһунан кэпсээтэ. 
Ил Дархан коронавируһу утары вакцинация тэтимэ өрөспүүбүлүкэ кэккэ оройуоннарыгар бытаарбытын туһунан эттэ. Кини этэринэн, ыам ыйынааҕы маассабай вакцинация туһунан быһаарыныы, төһө да нэһилиэнньэ өттүттэн кириитикэ баарын иһин, саамай сөптөөх буолар. «Мин Роспотребнадзор өрөспүүбүлүкэ нэһилиэнньэтин маассабайдык, сорох араҥатын булгуччулаахтык вакцинациялыыр туһунан этиитин өйөөбүтүм. Элбэх мөккүөр баара, ол эрэн билигин атын субъектар, ол иһигэр Москва уонна Санкт-Петербург эмиэ ити суолунан барбыттарын көрөбүт», - диэтэ Айсен Николаев. 
Бэс ыйын 27 күнүгэр коронавируһунан ыалдьыбыттар ахсааннара аҕыйаабыт соҕотох субъегынан Саха сирэ буолбута. «Атын субъектарга барыларыгар үрдээһин баран иһэр. Специалистар этэллэринэн, Саха сиригэр ыарыы намтаабыта вакцинация оҥоһулларыттан уонна хааччахтыыр миэрэлэр киирбиттэриттэн тутулуктаах. Атын регионнар хааччахтыыр миэрэлэри устубуттар. Биһиги ыарыы тарҕанарын тохтоттубут, онон намтаан иһэр», - диэн бэлиэтээтэ баһылык. 
Итини сэргэ, Айсен Николаев нэһилиэнньэни вакцинациялааһын оройуоннарынан араастык ыытылларын эттэ. «Сорох оройуоннарга нэһилиэнньэ көхтөөхтүк быһыыны ылар, сорохторго вакцинацияны утара сылдьаллар, ол иһин тэтимэ түстэ. Итиннэ үксүн олохтоох былаастартан тутулуктаах, төһө вакцинация наадатын өйдөтөллөрүттэн», - диэтэ кини.