Саха сиригэр сыл иһигэр 42 киилэттэн тахса наркотик былдьаммыт

2021 сыл аҕыс ыйдааҕы көрдөрүүтүнэн наркотигы кытта сибээстээх 331 буруй оҥоһуллубут. Ити көрдөрүү 2020 сыл аҕыс ыйдааҕы көрдөрүүтүттэн 18,6% намыһаҕа бэлиэтэннэ. Былырыын бу кэмҥэ 407 наркотигы кытта сибээстээх буруйу оҥоруу тахсыбыт. Ити көрдөрүүлэри быраабы араҥаччылыыр уорганнар салайааччыларын координационнай мунньахтарыгар дьүүллэстилэр. Бу туһунан Саха сирин прокуратурата иһитиннэрдэ.
Ити көрүллэр эйгэҕэ ыарахан уонна ураты ыарахан буруйдары оҥоруу 303-тэн 220-ҕэ диэри, ол эбэтэр  27,3 %, оттон улахан кээмэйдээх буруйдар 195-тэн 129-ка диэри, ол эбэтэр 33,8% намтаабыт. Наркотигы кытта сибээстээх буруйу оҥорууну арыйыы 20,2% улааппыт ( 59,8 %-тан 71,9 %-ҥа диэри). 2021 сыл аҕыс ыйын иһигэр 42 кг 497 г наркотик былдьаммыт. 
Прокуратура өрөспүүбүлүкэ кэккэ оройуоннарыгар наркотигы кытта сибээстээх буруйу оҥорууну арыйыы намыһаҕын, төһө да мээнэ үүнэр көлөппүнэ кэриҥэ улаханын иһин, суһал чаастар ити хайысханан тахсар буруйдары тохтоторго күүстээх миэрэлэри ыыппаттарын бэлиэтиир. 
Суһал сулууспалар уонна силиэстийэлиир уорганнар салайааччыларыгар наркотигы кытта сибээстээх буруйу оҥорууну арыйыы хайысхатынан туһааннаах сорудахтар бэриллибиттэрин туһунан иһитиннэриигэ этиллэр.  
Санатар буоллахха, 2021 сыл от ыйын 2 күнүттэн, Саха сирин прокурорунан бу иннинэ Сахалиҥҥа үлэлээбит Максим Попов анаммыта.