Саха сиригэр суукка иһигэр коронавируһунан ыалдьыы 144 түбэлтэтэ таҕыста

Өрөспүүбүлүкэҕэ санитарнай-эпидемиологическай быһыы-майгы уустугунан сыаналанар. Саха сирин территориятыгар коронавируһунан ыалдьыы 144 түбэлтэтэ таҕыста. Дьокуускай куоракка – 80 түбэлтэ. Вице-премьер Ольга Балабкина эппитинэн, ордук уустук балаһыанньа Сунтаар улууһугар үөскээбит, онно 15 киһи эбии ыалдьыбыт. 
«Бэҕэһээ суһал штаб мунньаҕар эбии хаачаахтааыһн миэрэлэрин ылынныбыт», — диэтэ Ольга Балабкина.
13 түбэлтэ Нерюнгри оройуонугар регистрацияламмыт. Оройуон суһал штаба уоппускаттан кэлбит дьону кытта үлэни күүскэ ыытар. Өрөспүүбүлүкэ суһал штаба уустук быһыы-майгы Мирнэй оройуонугар эмиэ үөскээбитин бэлиэтиир, итиннэ 7 киһи ыалдьыбыта биллибит.  Итинэн сибээстээн, суһал штабтар мунньахтарыгар Ил Дархан салалтатынан кэккэ санитарнай-эпидемиологическай миэрэлэр ылыныллыбыттар. Айхал уонна Удачнай суһал штабтарын иннигэр ИДЬМ сотрудниктарын кытта түүҥҥү кулууптар, дискотекалар үлэлэрин уонна гражданнар ирдэнэр нуормалары уонна быраабылалары тутуһалларын хонтуруоллуур сорук турда. Эбиитин итиннэ хойуу буруо турара этиллэр. 
«Мирнэй оройуонун олохтоохторугар туһаайан налыччы буола сатааҥ диибин. Наада буоллаҕына колл-кииҥҥэ уонна оройуоннааҕы Киин балыыһаҕа собуоннааҥ. Итинник буруо кэмигэр медицинскэй үлэһиттэр мааска кэтэри уонна таһырдьа аҕыйахта тахсары сүбэлииллэр», — диир өрөспүүбүлүкэ вице-премьера.
Суһал штаб информациятынан, өрөспүүбүлүкэҕэ кэлбит вакцина барыта Мирнэй оройуонугар ыытыллар. 
Коронавируһунан ыалдьыы 6 түбэлтэтэ Уус-Алдан улууһугар регистрацияланна. Алдан уонна Ленскэй оройуоннарыгар – 5-тии, Аллайыаха оройуонугар – 4, Мэҥэ-Хаҥалас улууһа – 3, Чурапчы улууһа – 2, Үөһээ Халыма, Бүлүү, Нам, Хаҥалас – биирдии түбэлтэ.