Саха сиригэр оҥоһуу өй лабораторията арылынна

Балаҕан ыйын 24 күнүгэр Дьокуускай куорат IT-пааркатыгар оҥоһуу өй (искусственный интеллект) лабораторията арылынна. СӨ Баһылыгын уонна Бырабыыталыстыбатын пресс-сулууспата иһитиннэрбитинэн, манна оҥоһуллар технологиялары олох араас эйгэтигэр – доруобуйа харыстабылыттан саҕалаан ойуур баһаардарын утары киллэрэллэрэ былааннанар.

Бу – Бырабыыталыстыба, М.К. Аммосов аатынан ХИФУ уонна Сбер холбоһуктаах бырайыактара, былырыын сэтинньи ыйга түһэрсиллибит үс өрүттээх меморандум чэрчитинэн олоххо киирдэ.  

СӨ Ил Дархана Айсен Николаев бэлиэтээбитинэн, кылгас кэм иһигэр бэрт үгүс үлэ ыытылынна, ол түмүгэр кэскиллээх бырайыак олоххо киирдэ.

Лабораторияҕа хайыы үйэ түөрт бырайыактыыр хамаанда үлэлээн саҕалаата, онно 26 киһи кыттар. 

Хаартыска: Мария Васильева түһэриитэ, СИА