Саха сиригэр медицинскэй чат үлэлиир

2023 сыл кулун тутар 1 күнүттэн  Саха сирин олохтоохторо медицинскэй тэрилтэлэри кытта Телеграм чат нөҥүө быһа ханаалга тахсыахтарын сөп диэн СӨ Доруобуйа харыстабылыгар министиэристибэтэ иһитиннэрдэ.

Медицинскэй көмө хаачыстыбатын үрдэтэр сыаллаах быһа ханаал «ЗдравКонтроль» саҥа федеральнай бырайыак чэрчитинэн үлэлиир.

«Телеграм» мессенджергэ регион олохтоохторугар анаан медицинскэй чаттар оҥоһулуннулар, итилэргэ киирэн медицинскэй тэрилтэлэр бэрэстэбиитэллэриттэн, икки чаас иһигэр, ыйытыыларга хоруйу ылыахха сөп. Ыйытыылары бэнидиэнньиктэн субуотаҕа диэри  08:00 чаастан 20:00 чааска диэри бэриллэр.

Медицинскэй чаттарга маннык сигэнэн киириллэр:

«Якутск. Здоровье» (Дьокуускай куорат бары медицинскэй тэрилтэлэрэ);

«Саха. Здоровье» (Дьокуускай куораттан ураты өрөспүүбүлүкэ бары медицинскэй тэрилтэлэрэ).

Сүрүн ыйытыллар кыһалҕалар: бырааска суруттарыы, бырааһы дьиэҕэ ыҥырыы, чэпчэтиилээх эмптэри ылыы, этика уонна деонтология кэһиллиитэ, төлөбүрдээх өҥөлөрү соҥнооһун уо.д.а.

Чаттарга эмтэниигэ, эми-тому анааһыҥҥа сыһыаннаах консультацияны биэрбэттэр уонна диагноһы туруорбаттар.

«Медчаттар – ити аныгы уонна табыгастаах үлэ көрүҥэ. Биһиги бырайыагы тута өйөөтүбүт, кини ыарыһахтар кыһалҕаларын кылгас болдьох иһигэр быһаарарга көмөлөһөр. Өрөспүүбүлүкэҕэ медицина тоҕоостоох уонна хаачыстыбалаах буоларыгар үлэлиибит», − диэн бэлиэтиир СӨ Доруобуйа харыстабылыгар миниистирэ Лена Афанасьева.

Бырайыак Арассыыйа Доруобуйа харыстабылыгар министиэристибэтин,  Росздравнадзор уонна Уопсастыбаннай палаататын өйөбүллэринэн олоххо киирдэ. Кинини Бэрэсидьиэн гырааннарын пуондата үбүлүүр.