Саха сиригэр коронавируһунан ыалдьыбыт 30 киһи ыарахан туруктаах

Саха сирин 127 олохтооҕо Дьокуускай куорат уонна аҕыс оройуон реанимационнай салааларыгар эмтэнэ сыталлар, онтон 30 киһитэ ыарахан туруктаах ИВЛ аппараатыгар холбоммут. Ол туһунан өрөспүүбүлүкэтээҕи суһал штаб мунньаҕар этилиннэ. 
Балаҕан ыйын 21 күнүнээҕи туругунан, региоҥҥа коронавирус инфекциятынан 170 киһи эбии ыалдьыбыта билиннэ, ол иһигэр Дьокуускай куоракка — 102 киһи. Саҥа түбэлтэлэр өрөспүүбүлүкэ 23 оройуоннарыгар бэлиэтэннилэр. Доруобуйа харыстабылын миниистирэ Елена Борисова иһитиннэрбитинэн, ковидынан ыалдьыы регион 18 оройуонугар үрдээбит, ол иһигэр Дьокуускайга,  Нерюнгрига, Мирнэйгэ уонна Мэҥэ-Хаҥалас улуустарыгар.
Ааспыт нэдиэлэни кытта тэҥнээтэххэ өрөспүүбүлүкэҕэ ыалдьыбыт, эмтэнэр киһи ахсаана 17%, оттон ыарахан туруктаах ыарыһах ахсаана 19,7% үрдээбит.  Оҕо ыалдьааһына 20% эбиллибит. 
Итини сэргэ, оскуола үөрэнээччилэрин уонна ыччат ортотугар тыынар уорган вируснай инфекцията (ОРВИ) элбээбитэ бэлиэтэннэ. Саха сиринээҕи Роспотребнадзор Управлениетын салайааччытын солбуйааччы Изабелла Самойлова эппитинэн, бары үөрэх кыһаларыгар сарсыарда өттүгэр температатураны кээмэйдээн, ыалдьыбыттары булар үлэни күүһүрдэр сорук турар. 
СӨ Ил Дархана Айсен Николаев коронавирус инфекциятын утары вакцинация уонна ревакцинация туһатын сырдатыыны кэҥэтэр, хааччахтыыр миэрэлэри (мааскалаах сылдьыы, социальнай дистанцияны тутуһуу) күүһүрдэр сорудаҕы биэрдэ. Кини вакцинациялааһын хампаанньатын тэтимин түргэтэтии улахан суолталааҕын бэлиэтээтэ.