Саха сиригэр – Инклюзивнай үөрэхтээһин күннэрэ

Үөрэх уонна наука министиэристибэтин пресс-сулууспата иһитиннэрэринэн, муус устар 5-16 күннэригэр өрөспүүбүлүкэ үрдүнэн Инклюзивнай үөрэхтээһин күннэрэ ыытыллар. Икки нэдиэлэ устата төрөппүттэргэ уонна оҕолорго, ону таһынан ураты оҕолору кытта үлэлиир специалистарга аналлаах араас тэрээһиннэр ыытыллыахтара. Төрөппүттэр үөрэхтээһин, психолог-медик-педагог хамыыһыйатын, реабилитация, профориентация туһунан ыйытыыларыгар хоруй ылыахтара. Ону таһынан эрдэтээҕи көмө сулууспатын, оскуола иннинээҕи үөрэхтээһин, уопсай үөрэхтээһин тэрилтэлэрин (ол иһигэр коррекционнай, эбии үөрэхтээһин уонна орто анал үөрэхтээһин) үлэлэрин сиһилии билсиэхтэрэ. С.Н. Донской аатынан Үөрэх сайдыытын уонна идэни үрдэтии институтугар семинардар ыытыллыахтара.

“Харысхал” аһыма пуонда, “Радуга” реабилитационнай киин оҕолорго ментальнай арифметикаҕа, мультипликацияҕа уонна театральнай маастарыстыбаҕа маастар-кылаастары тэрийиэхтэрэ. Тэрээһиннэр тустарынан сиһилии үөрэх уонна наука министиэристибэтин сайтыгар булан көрүөххүтүн сөп. Билсэр төл. 8(4112)506945.