Саха сиригэр гражданнары хаарбах туруктаах дьиэттэн көһөрүү салҕанар

Тутуу министиэристибэтигэр 2022 сыллааҕы сайаапкаларынан үлэ тэтимнээхтик барар. Дьиэ хаһан хаарбах туруктааҕынан билиниллибититтэн көрөн, олохтоохтору көһөрүү болдьоҕо чуолкайданар. Киһи доруобуйатыгар уонна олоҕор куттал суоһуур буоллаҕына көһөрүү болдьоҕо түргэтээн биэрэр. Ол туһунан социальнай ситимҥэ ыытыллыбыт быһа эфиргэ өрөспүүбүлүкэ тутууга миниистирэ Павел Кылатчанов  кэпсээтэ. 
Хаарбах туруктаах дьиэттэн гражданнары көһөрүү бырагыраамата 6 түһүмэхтээх. 2019 сыллааҕы түһүмэх бүппүт, аны быйыл 2020 сыллааҕы түһүмэх түмүктэнэр. Хас биирдии түһүмэх 2 сыллаах халандаарынай кэмнээх. Өрөспүүбүлүкэ тутуутун Министиэристибэтигэр сыл саҥатыттан 2022 сыллааҕы түһүмэх сайаапкаларын көмүскээһиҥҥэ үлэ ыытыллар. 
«Сайаапка көмүскэннэ, тэтимнээхтик үлэлээн эрэбит. Бу сыл бүтүүтэ 2023 сыллааҕы сайаапкалар көмүскээһиннэрин саҕалыахпыт. Биһиги бырагыраамабыт түргэнник олоххо киирэригэр, гражданнар түргэнник саҥа дьиэни, эбэтэр компенсацияны ылалларыгар интириэстээхпит. Үлэ бырабыыталыстыба таһымыгар ыытыллар. Бэйэни салайыныы уорганнарыгар сайаапкалары Министиэристибэҕэ түргэнник биэрэр курдук үлэ эмиэ барар»,  – диир миниистир.
Миниистир бэлиэтээбитинэн, дьиэ хаарбах чинчилээх, конструкцията хамсаабыт, уларыйбыт буоллаҕына олохтоохтор бэйэлэрэ аналлаах тэрилтэлэртэн чинчийии сакаастаан оҥотторуохтарын сөп. Ол кэннэ муниципальнай хамыыһыйа дьиэ хаарбах туруктааҕын туһунан быһаарыныы ылынар. 
«Дьиэни бас билээччилэр чинчийии ыытыллыбытын туһунан уонна отчуоттаах докумуоннары илдьэ муниципальнай хамыыһыйаҕа кэлэн дьиэ хаарбаҕынан ааҕылларын дуу, суоҕун дуу чуолкайдаһыахтарын наада», – диир Павел Кылатчанов.