Саха сиригэр эбии 2 526 туонна бурдук кэлиэҕэ

Саха Өрөспүүбүлүкэтин Баһылыгын уонна Бырабыыталыстыбатын пресс-сулууспатын информациятынан, Саха сиригэр социальнай суолталаах ас-үөл саппааһын элбэтэр сорук турар, ол иһигэр бурдук эмиэ киирсэр. Оройуоннарга бурдук саппааһа нэһилиэнньэни 180 хонукка хааччыйыыга тиийэр. Бу туһунан улуус баһылыктарын кытта мунньах түмүгүнэн Саха сирин Бырабыыталыстыбатын Бэрэссэдээтэлэ Андрей Тарасенко иһитиннэрдэ. 
Бу иннинэ Ил Дархан Айсен Николаев регион тэрилтэлэригэр аһы-үөлү урутуур эрэсииминэн аҕалыыны өйүүр уонна өрөспүүбүлүкэбит аһа-үөлэ бүтэр куттала суох буолуутун соругун туруорбута.
«Стабильнай туруктаах оройуоннар бааллар, ол эрэн, сорох сирдэргэ саппааһы мөлтөхтүк дьаһанааччылар эмиэ бааллар. Оройуон баһылыктара миэстэлэринэн ас-үөл кыһалҕата хайдаҕын билиэхтээхтээхтэр. Булгуччу предпринимателлэри кытта сибээскитин тутуҥ уонна бородууктаны аҕалыыга, таһаҕаһы тиэйиигэ тахсыбыт кыһалҕаны түргэнник быһаарар курдук, аһы-үөлү аҕалааччы вагоннар нүөмэрдэрин кытта, суһаллык биһиэхэ биллэрэн иһиҥ», - диэтэ Андрей Тарасенко муниципальнай тэриллиилэр салайааччыларыгар туһаайан.

Өрөспүүбүлүкэбит 7 улахан атыы-эргиэн тэрилтэлэрин дааннайдарынан, билиҥҥи туругунан 2 800 туонна бурдук саппааһа баар.
Андрей Тарасенко өрөспүүбүлүкэбитигэр предпринимателлэри өйүүр миэрэлэр ылыллыбыттарын туһунан санатта уонна бу туһунан сырдатыыны хас биирдии аһы-үөлү тиэйэр тэрилтэлэргэ тиэрдиҥ диэн оройуоннар баһылыктарыгар сорудахтаата.
Санатар буоллахха, кууһунан эбэтэр биирдиилээн атыы-эргиэн эйгэтин дьоҕус, орто предпринимательствотын субъектарыгар чэпчэтиилээх иэс ылааһын уонна сылга 8%-х кредиттэригэр 1 сыллаах болдьоххо рефинансирование баар буолбут. Нолуогу судургу систиэмэнэн төлүүр бары көрүҥ предпринимателлэргэ административнай хааччахтар уһуллубуттар уонна кредит ылалларыгар ставкаларын бырыһыана кыччаан биэрбит.
Өрөспүүбүлүкэ бүддьүөтүгэр бурдугу атыылаһарга 114,3 мөл. солк. кээмэйдээх субсидия көрүллүбүт. Арктика уонна уустук суоллаах-иистээх оройуоннарга ас-үөл эбии саппааһын оҥорорго «Якутоптторг» тэрилтэҕэ 208,1 мөл. солк. субсидия бэриллибит.