Саха сиригэр быыбарга хомуньуустар хоппуттар

Өрөспүүбүлүкэтээҕи Киин быыбардыыр хамыыһыйа РФ Судаарыстыбаннай Думатыгар депутаттары талар куоластааһын түмүгүн таһаарда. КПРФ куолас 35,15% ылан политическай баартыйалар ортолоругар инники күөҥҥэ тахсыбыт. Баартыйа бэрэстэбиитэлэ Петр Аммосов биир мандааттаах уокурукка быыбардааччылар саамай элбэх куоластарын ылбыт. 
Регион олохтоохторо атын баартыйаларга биэрбит куоластара – «Биир ньыгыл Арассыыйа» (33,22%), «Саҥа дьон» (9,87%), «Сиэрдээх Арассыыйа – Кырдьык иһин» (8,19%). Дьокуускайга хомуньуустар 38,59%, «Биир ньыгыл Арассыыйа» 26,63%, «Сиэрдээх Арассыыйа – Кырдьык иһин» — 11,09%, «Саҥа дьон» — 10,9% куолаһы ылбыттар.
Биир мандааттаах уокурукка быыбардааччылар саамай элбэх куоластарын хомуньуус Петр Аммосов ылбыт. Кини туһугар 69 215 тыһыынча быыбардааччы куолаһын биэрбит, ол эбэтэр 21,61%.  Петр Черкашин («Биир ньыгыл Арассыыйа»), кыранан хаалан 20,07% куолаһы ылбыт. Федот Тумусов үһүс миэстэҕэ тиксибит – кини туһугар өрөспүүбүлүкэ 62 597 олохтооҕо, ол эбэтэр 19,55% куоластаабыт. 
Киин куоракка Аммосов иһин 18,68%, Федот Тумусов иһин 21,23%, Черкашин иһин 16,69% быыбардааччы куолаһын биэрбит. «Саҥа дьон» баартыйа бэрэстэбиитэлэ Василий Николаев иһин 15,22%, Анатолий Ноговицын иһин («Яблоко» баартыйа) 10,27% быыбардааччы куоластаабыт.
Ил Түмэн депутаттарын эбии таларга Университеттааҕы уокурукка ХИФУ ректора Анатолий Николаев 43,22% куоластаах кыайыылааҕынан тахсыбыт, Халыма-Индигиир 3 №-дээх биир мандаттаах уокуругугар Сахамин Афанасьев хоппут, экология миниистирин туһугар  3535 быыбардааччы куоластаабыт. 
Куоластааһыҥҥа барыта 337 758 киһи кыттыбыт (51,23%), Дьокуускай куоракка — 43,83%, ол эбэтэр 217 тыһыынча киһи Конституциянан көрүллэр быраабынан туһаммыт.