Саха сиригэр Бүтүн Арассыыйатааҕы нэһилиэнньэ биэрэпиһин контролердарын үөрэтэллэр

Алтынньы 4 күнүттэн Саха сирин территориятыгар Бүтүн Арассыыйатааҕы нэһилиэнньэ биэрэпиһин контролердарын үөрэтии ыытыллар. Муниципальнай оройуоннар контролердарыгар үөрэтии онлайн эрэсииминэн, «Дьокуускай куорат» уонна «Жатай» куораттааҕы уокуруктарыгар – очнай көрүҥүнэн диэн иһитиннэрэр СӨ Федеральнай судаарыстыбаннай статистика сулууспатын Территориальнай уоргана. 
Нэдиэлэ саҥатыттан контролердар Дьокуускай куорат таһынааҕы нэһилиэнньэлээх пууннарга, куорат уокуруктарыгар уонна  «Жатай» куораттааҕы уокуругар үөрэҕи аастылар. 
Алтынньы 15-17 күннэригэр 257 бэлэмнээх контролердар өрөспүүбүлүкэ 1599 биэрэписчигин үөрэтэллэрэ былааннанар. 
Контролер – биэрэпис иннинэ аадырыстары бэрэбиэркэлиир, хонтуруоллуур, түмүктэри бэрэбиэркэлиир, биэрэписчиктэр үлэлэрин тутар, биир тылынан эттэххэ салайар үлэһит. Кини МФЦ-га биэрэпис учаастактарын үлэлэрин тэрийэр, нэһилиэнньэ ортотугар биэрэпис боппуруостарынан информационнай-сырдатар үлэни ыытар, ИДьМ участковайдарын кытта биэрэпис персоналыгар куттал суоһаабатын хааччыйар. 
Биэрэписчик үлэтин хаачыстыбатын хонтуруоллуур сыаллаах контролер аадырыстарынан сылдьар, бастакы уочарат, ааннарын арыйбатах эбэтэр дьиэлэригэр таба туттарбатах ыалларга. Ити сыалынан кини ОДьКХ тэрилтэлэрин, салайар хампаанньалары, ТСЖ-лары кытта бииргэ үлэлэһэр. 
Итини сэргэ контролер толоруллубут электроннай лиистэри мобильнай тэриллэртэн эбэтэр резервнэй SD-тан ыларга эппиэттиир уонна биэрэпис бүтүөр диэри күн аайы уполномоченнайга биэрэпис боппуруостарынан информацияны тириэрдэр.