Саха сиригэр 40 тыһыынча дуоза вакциина эбии кэллэ

Коронавирус дьаҥын утары «ЭпиВакКорона» вакциина 40 тыһыынча кэриҥэ ахсааннаах дуозата кэллэ. 
Ол туһунан күн ахсын ыытыллар брифиҥҥэ коронавирус дьаҥын утары охсуһар регионнааҕы суһал штаб салайааччытын солбуйааччы Ольга Балабкина иһитиннэрдэ. 
«Кэлбит вакциина барыта Саха сирин оройуоннарынан түҥэтиллиэҕэ», - диэн эттэ Ольга Балабкина. Кини информациятынан, бүгүҥҥү күннээҕи туругунан коронавирус инфекциятын утары быһыыны 204 551 киһи ылбыт.
Саҥа кэлбит вакциина баартыйатын аахпакка туран, уопсайа өрөспүүбүлүкэҕэ кэлбиттэн 92% вакциина туттуллубут. 
«Коронавирустан киһи өлүүтүн түбэлтэтин туһунан биһиэхэ күн аайы биллэриллэрин кэриэтэ. Ити ыарыыны вакцинация эрэ тохтотуон сөп», - диэн эбэн эттэ регионнааҕы суһал штаб салайааччытын солбуйааччы.