Саха сирэ суол оҥоруутугар рекордун хатылаата

«Дьокуускайдааҕы ГАИ пуоһуттан Владимировкаҕа диэри «Умнас» массыына суолугар үлэ саҕаланна. Марха өттүттэн «Нам» массыына суолун учаастагын саҥардан оҥоруу салҕанар. Ленскэй, Томпо уонна Өймөкөөн улуустарыгар 4 муостаны үлэҕэ киллэрии былааннанар. Быйыл куорат олохтоохторун уонна ыалдьыттарын Дьокуускай куоракка Ленин проспегын саҥардан оҥоруу тэтимэ долгутта. Ити үлэ толору эһиил алтынньы 31 күнүгэр түмүктэниэҕэ. Киин куорат Олохтоох дьаһалтатын проспегы чопчу болдьоҕор арыйыыны хааччыйарыгар көрдөһөбүн», - диэтэ Айсен Николаев.

Санатар буоллахха, 2021 сыл түмүгүнэн, Саха сиригэр 501 км суол өрөмүөннэммит, итинтэн 48,5 км – Дьокуускайга. «Куттала суох, хаачыстыбалаах суоллар» национальнай бырайыак чэрчитинэн, 2018-2022 сылларга өрөспүүбүлүкэҕэ 2,5 тыһыынча км массыына суола уонна 47 муоста тутулунна. 

РФ бэрэсидьиэнэ Владимир Путин сорудаҕынан, 2030 сылга диэри, өрөспүүбүлүкэҕэ «Өлүөнэ», «Бүлүү» уонна «Халыма» федеральнай суолларынан төгүрүк сылынан айан хааччыллыаҕа. Ураты миэстэни Өлүөнэ муостата ылар, бырайыак Бүтүн Арассыыйатааҕы таһымнаах. Муоста биир кэлим тырааныспар сибээһинэн үс федеральнай суолу уонна тимир суолун ситимниэҕэ.