Саха политехническай лицейгэ өрөмүөн үлэтэ биир бастакынан түмүктэннэ

Хапытаалынай өрөмүөн 10-с, 20-с, 21-с, 23-с, 27-с, 31-с, 33-с, 36-с №-дээх орто оскуолаларга, Саха политехническай лицейга, Дьокуускай куораттааҕы национальнай гимназияҕа, Марха дьоҕус оройуонун 1-гы №-дээх оскуолатыгар оҥоһулунна. «Главстрой» МХТ (муниципальнай сакаасчыт) информациятынан, хапытаалынай өрөмүөнү ыытарга  900 мөлүйүөн солкуобайтан тахса үп көрүллүбүт, итинтэн 800 мөлүйүөн солкуобайа – федеральнай, 89 мөлүйүөн солкуобайтан тахса суума – олохтоох бүддьүөттэртэн.

Саха политехническай лицей дириэктэрэ Надежда Константиновна Тимофеева информациятынан, 117 мөлүйүөн солкуобай суумалаах өрөмүөн оҥоһуллубут, итиэннэ материальнай-техническэй өттүнэн хааччыйыыга 11 мөлүйүөн солкуобай көрүллүбүт, инньэ гынан  аактабай саалаҕа, остолобуойга наһаа үчүгэй тэриллэри, итиэннэ көмпүүтэрдэри атыыласпыттар.

Хапытаалынай өрөмүөнү «Монтажник»  диэн производственнай кооператив муус устар 20 күнүттэн саҕалаан атырдьах ыйын 18 күнүгэр диэри ыыппыт. Оскуола кэлэктиибэ бэдэрээтчит хаачыстыбалаахтык үлэлээтэ, болдьоҕор түмүктээтэ,  бастаан хойутуохпут диэн куттаммыттарын биллэрдэ.

Оскуолалара 1978 сыллаахха тутуллубут, баччааҥҥа диэри хапытаалынай өрөмүөн оҥоһуллубатах, кэлэктиип өрөмүөнү олус өр күүппүт. Арай 2017 сыллаахха федеральнай бырагырааманан «сейсмоусиление» диэҥҥэ хабыллан хамсаабаттарын курдук сыбаайаларын, муосталарын, түннүктэрин уларыппыттар, истиэнэлэрин бөҕөргөппүттэр.