«Саха» НКИХ Дыгын Оонньууларын быһа биэриитин икки ханаалынан көрдөрүө

«Саха» НКИХ уонна «Якутия 24» Дыгын Оонньууларын быһа биэриитин икки ханаалынан көрдөрүөхтэрэ.
Быһа эфир бэс ыйын 26 күнүгэр олохтоох бириэмэнэн 16.00 чааска саҕаланыа уонна үс чаас тухары буолуо. 
Бэс ыйын 27 күнүгэр, күрэхтэһии түмүктүүр күнүн быһа эфирэ, олохтоох бириэмэнэн 12.00 чааска саҕаланыа уонна 5 чаас уһуннаах көстүө.
Манна даҕатан эттэххэ, «Якутия 24» ханаалга аан бастакы төгүлүн күрэхтэһии нуучча тылынан комментарийдаах барыа. Эфири сайт ханаалларыгар «Прямой эфир» кыбытыкка, ону сэргэ Smart TV сыһыарыыга Samsung, LG тэлэбиисэрдэргэ уонна «Саха» НКИХ IOS уонна Android төлөпүөннэргэ анаммыт мобильнай сыһыарыытыгар көрүөххэ сөп. 
«Дыгын Оонньууларын» турнира «Туймаада» стадиоҥҥа ыытыллыа. Күрэхтэһиигэ спортсменнэртэн ураты тренердэр уонна тэрийээччилэр эрэ киириэхтэрэ. 
Бастыыр иһин Леонид Филиппов (Амма), Вячеслав Дьяконов (Нам), Дьулустаан Ноговицын (Горнай), Николай Матаннанов (Таатта), Егор Филиппов (Хаҥалас), Тимофей Большаков (Сунтаар), Артем Варданян (Нам), Владимир Федоров (Ньурба), Павел Друзьянов (Чурапчы), Дмитрий Петров (Бүлүү), Никита Новгородов (Уус-Алдан), Айсен Елисеев (Дьокуускай) киирсиэхтэрэ.