«Саха графиката: саҥалыы көрүү»

Быыстапка саха искусствотын визитнэй карточкатын – графиканы араас тиэхиньикэнэн уонна матырыйаалынан көрдөрөр. Маннык үлэлэри музейга дэҥҥэ түбэһэн көрүөххэ сөп. Тоҕо диэтэххэ графическай лиистэри сырдыктан уонна сииктэн харыстаан, киэҥ араҥаҕа сэдэхтик таһаараллар.

Саха график худуоһунньуктарын ааспыт үйэ 60–70-с сылларыгар Бүтүн Арассыыйа үрдүнэн ситиһиилэрин төрүөтүнэн саҥа эстамп ньымаларын баһылааһыннара буолбута; аан дойду, тулалыыр эйгэ кэрэтин саҥалыы көрүүгэ олук уурбута.

1980-1990 сылларга худуоһунньуктар төрүт култуураҕа тирэҕирэн, олох-дьаһах философскай өрүтүн таарыйаллар. Аныгы графиктар уобарастара биир халыып быһаарыллыбат уонна көрөөччүгэ хартыынаны бэйэтэ ситэрэригэр кыах биэрэллэр.

Сонун быыстапка үс тиэмэҕэ арахсар: «Алаас», «Алгыс» уонна «Арктика».

«Алаас» диэн от күөҕэ саалаҕа туруоруллубут айымньылар киһи күннээх, тыыннаах эйгэтин көрдөрөллөр, композициялар сырдык, үтүө энергетикалаахтар.

«Алгыс» диэн кыһыл саалаҕа былыргы номоххо, фольклорга, саха култууратыгар үгэс буолбут сиэргэ-туомҥа анаммыт сюжеттар киирбиттэр, айымньылар эпическэй ис хоһоонноохтор.

 «Арктика» халлаан күөҕэ саалаҕа худуоһунньуктар уһук хоту туһунан өйдөбүллэрэ уустук, дьикти холбоһук быһыытынан көрдөрүлүннэ. Арктика ийэ айылҕатын уобарастара норуот, култуура уратытыгар арылхайдык көстөр, маны барытын концептуальнай хайысхаҕа көрүөххэ наада. 

Экспозицияны саха ааптардарын скульптуралара силигин ситэрэн, ис хоһоонун байытан биэрэллэр. Н. Федулова гобелена быыстапканы уратытык саҕалыыр уонна түмүктүүр, төрүт үгэстэргэ хорсун, сонун идиэйэлэри булар кыаҕы кэрэһилиир.

Музей үлэтин эрэсиимэ: сэрэдэ – 12.00-20.00 чч. (каасса 19.30 чааска диэри үлэлиир), чэппиэр-баскыһыанньа – 10.00-18.00 чч. (каасса 17.30 чааска диэри үлэлиир), бэнидиэнньик-оптуорунньук – өрөбүл күннэр.

Билсэр төлөпүөннэр: 8 (4112) 33-52-79, 8 (4112) 33-52-80 (каасса).

Быыстапка үлэлиир сирэ: Дьокуускай куорат, Киров уул., 9, Национальнай художественнай музей.