“Саха АССР 100 сылыгар – 100 бастыҥ уопсастыбаннай көҕүлээһин”

Аны икки сылынан Саха АССР төрүттэммитэ 100 cылын бэлиэтиэхпит. Өрөспүүбүлүкэ бэлэмнэнэн саҕалаабыта, тэрээһиннэр былааннара оҥоһуллар.

Үбүлүөйдээх сылы көрсө 100 бастыҥ уопсастыбаннай көҕүлээһин ааттаныаҕа. “100 бастыҥ уопсастыбаннай көҕүлээһин” куонкурус сыала-соруга – өрөспүүбүлүкэ социальнай-экономическай сайдыытыгар уопсастыбаны, бизнеһи, салайар уорганнары уонна нэһилиэнньэни сомоҕолооһун. Бастыҥнары 2016-2021 сылларга быһаарыахтара. Түөрт сыл устата уопсайа 69 үлэ кыайыылааҕынан биллэрилиннэ.

Былырыыҥҥыттан кыайыылаахтар куоластааһынынан талыллаллар, “Бастыҥ гражданскай көҕүлээһин” бэлиэнэн наҕараадаланаллар. Кылаан кыайыылаахтар спонсордартан сыаналаах бириистэри туталлар.

Куонкурус икки түһүмэҕинэн ыытыллар. Өрөспүүбүлүкэ, улуус (куорат), нэһилиэк таһымнаах диэн арахсар.  

2022 сылга “Саха АССР 100 сылыгар – 100  бастыҥ уопсастыбаннай көҕүлээһин” диэн Бочуот кинигэтэ тахсара былааннанар. Онно куонкурус бары кыайыылаахтарын уонна спонсордары киллэриэхтэрэ. Бу туһунан СӨ Ыччат дьыалаларыгар уонна социальнай коммуникацияларга министиэристибэтэ иһитиннэрэр.