Сааны бас билии быраабылата уларыйар
Кулун тутар 1 күнүттэн Арассыыйаҕа сааны бас билии быраабылалара уларыйар.
ТАСС иһитиннэрэринэн, чуолаан сааны бас билиигэ медицинскэй чинчийиини ааһыы бэрээдэгэ уларыйар. Ол эбэтэр, быраас саа ылыан баҕарар киһи арыгыга уонна наркотикка сыһыанын саарбахтаатаҕына, наадалааҕынан аахтаҕына, психологическай тургутан көрүүгэ ыытар кыахтанар.
Саа ыларга көҥүлү биэрэр медицинскэй чинчийиини муниципальнай эбэтэр судаарыстыбаннай медицинэ тэрилтэлэригэр эрэ ааһыахха сөп буолуоҕа. Маны таһынан Росгвардия бу киһи сааны ыларыгар чахчы медицинскэй чинчийиини чиэһинэйдик ааспытын тута бэрэбиэркэлиир кыахтаныаҕа.
Урут быраастар хамыыһыйаларын биэс сылга биирдэ ааһыахтааххыт диир буоллахтарына, сааны бас билэр дьон аны, бастакытын атыылаһар эбэтэр уруккуттан сэрии сэбинэн туттар дьон бары, хамыыһыйаны ааһар эбээһинэстэниэхтэрэ (байыаннайдартан ураты).
Оттон Росгвардия сааны бас билээччи саҥа ыарыыларын туһунан информацияны электроннай ньыманан тутар буолуоҕа, бу ыарыыга саа көҥүллэммэт түгэнигэр, гражданин саатын сонно туттарыахтаах. Маннык кытаанах ирдэбиллэр сэрии сэбин коллекционердарыгар кытта сыһыаннаах буолуохтара.
Маны таһынан, Росгвардия информационнай систиэмэтин иһинэн хас биирдии ботуруон электроннай учуотун киллэрэр туһунан кэпсэтиилэр баран эрэллэр.
Сонуннар
Ордук ааҕаллар
