Сааланыыга сахалар – Европаҕа бастыҥнар

Москва кытыытынааҕы “Саһыл уйата” спорт комплекска бэс ыйын 3-6 күннэригэр ыытыллыбыт спортиҥҥа Европа 54-с чемпионатыгар сахалар күннээтилэр. 10 дойду:  Германия, Франция, Англия, Венгрия, Латвия, Литва, Беларусь, Казахстан,  Азербайджан уонна Арассыыйа бу көрүҥҥэ 240 бастыҥнара ким ордук бэргэнин быһаарыстылар. 

Кэбээйиттэн кэскиллээх Николай Кобяков абсолютнай чемпион буолла! Арассыыйа спордун маастара уонна дойду хас да төгүллээх чемпиона 200 тэриэлкэттэн    182-тин үнтү ытта.

Тааттаттан төрүттээх Аан дойду уонна Европа чемпиона, аатырар Айаал Макаров 180 очукуону хомуйан, абсолютнайга үһүс буолан, баай коллекциятыгар боруонса мэтээли эбиннэ. Ырыаһыт Игорь Егоров 10 бастыҥ иһигэр киирдэ. Иккис миэстэҕэ Венгрия бэрдэ Андрес Черданели кыбылынна.

15 саастаах Рамир Николаевпыт эдэрдэртэн 164 (саамай элбэх) тэриэлкэни тапта. Кини Азияҕа эмиэ бастаан турар. Онон икки континент чемпиона! Василий Алексеевпыт саастаахтарга 145 очукуоланан, пьедестал үһүс үктэлигэр таҕыста.

Айаал Макаров уонна Рамир Николаев хамаанданан күрэхтэһиигэ киирсэн, кыһыл көмүс мэтээллэри эбии  иилиннилэр!

Саалаах сахалар – бэргэн ытааччыларга бастыҥнар!