Саахыматчыттар сөҕүмэр ситиһиилэрдээхтэр

Екатеринбурга түмүктэммит саахымакка Арассыыйа ыччаттарын чемпионатыгар 19-гар диэри саастаахтарга Арсений Чумаевскай “классическай” көрүҥҥэ үрүҥ көмүс мэтээли ылары ситистэ уонна аан дойду эбэтэр Европа уолаттарын чемпионатыгар кыттар быраабы ылла.

Саха сирин саахыматчыттара маннык үрдүк көрдөрүүнү өтөр-наар ситиһэ иликтэр. Арина Васильева төрдүс миэстэлэннэ уонна Арассыыйа үрдүкү  лигатыгар күрэхтэһэр быраабы ылла. “Саахымат композициятыгар” Полина Пак — кыһыл көмүс, Арина Васильева боруонса мэтээллэргэ тиксэн, Арассыыйа сүүмэрдэммит хамаандатыгар киирэр быраабы ыллылар.

Уһук Илин улахан дьоҥҥо чемпионатыгар “Саахымат композициятыгар” 15 саастаах Альберт Постников чөмпүйүөн үрдүк аатын сүктэ, Владислав Жирков — иккис, Арсений Чумаевскай — үһүс, тренер Роман Ганжуров төрдүс миэстэлэннилэр. Дьахталларга 19 саастаах Полина Пак үһүс буолла, Арина Васильева “рапидка” чөмпүйүөннээтэ. Владислав Жирков үһүс миэстэҕэ тигистэ, “блицкэ” — иккис.

Саахыматчыт оҕолору тренер Роман Ганжуров эрчийэр. Өрөспүүбүлүкэ федерациятын бэрэсидьиэнэ Владимир Егоров этэринэн, ситиһии уонча сыллаах үлэ түмүгүнэн уонна икки гроссмейстер сыһыарыллан үлэлээбиттэринэн кэллэ.