Саҥа тиэхиньикэ үлэлии таҕыста

Үс Zauberg M1250 (урут туһаныллар «Бобкэт» курдук) мини-погрузчик уонна икки «Бродвей» массыына киин куорат суолларыгар түүҥҥү симиэнэҕэ тахсаллар диэн “Якутдорстой” иһитиннэрэр.

“Бродвей” сиппийэр-сууйар тиэхиньикэ суол устатын түргэнник ыраастыырга туттуллар. Үс суоккатынан харбаабыт бөҕүн тута иннигэр сылдьар самосвалга сүөкүүр. Массыынаҕа иилиллэн 12 чааска диэри тохтоло суох үлэлиир үрдүк кыамталаах. Быылы хаптатар систиэмэлээх буолан үлэтин кэмигэр буору бурҕаппакка хомуйар. Бордюрдар кытыыларын хомуйарга анал гидравликалаах. 25 км/ч түргэннээхтик сүүрэр кыахтаах.

Zauberg M1250 мини-погрузчик саамай сыаналанара – дьоҕус кээмэйэ. Дьоҕус тыраахтар курдук буолан онно-манна батымтыа, эргим-ургум туттара сыыдам. Биһиги тымныы кыһыммытыгар өссө биир табыгастаах өрүтэ – салонун иһин ититэр систиэмэлээх. Хаары, бөҕү баһан ылар хомуоһа атын погрузчиктартан төһө эмэ улахан.