Саҥа сулууспаҕа эрэл улахан

Дьокуускай куорат дьаһалтатыгар саҥа структура эбилиннэ –  Гражданскай оборона уонна ыксаллаах быһыы-майгы управлениетын иһинэн аварийнай быыһыыр сулууспа.

Дьаһалтаҕа маннык салаа саҥа баар буолла. Сулууспа муус устар ыйга тэриллибит, онтон сэтинньигэ аварийнай быыһыыр үлэни ыытарга быраабы ылар сүрүн докумуонун – сибидиэтэлистибэ туппут.

Евгений Григорьев кэпсээбитинэн, кылгас кэм иһигэр сулууспа тиэхиньикэнэн хааччылынна, 15 киһилээх састаап сүүмэрдэннэ, салайааччынан Роман Крутихин ананна.

Байыастар баазалара куорат киинигэр – Орджоникидзе болуоссатыгар турар. Онон, ыксаллаах быһыы-майгы тахсар түгэнигэр, куорат хайа баҕарар муннугар суһаллык тиийэр кыахтаахтар.

Баһылык кэпсээбитинэн, сулууспа муус устарга тэриллиэҕиттэн быыһааччылар хайыы үйэ ЫБММ эриэйдэлэригэр көхтөөхтүк кытталлар, халаан кэмигэр дьону, кыыллары эвакуациялыырга көмөлөспүттэр, быстах кэмҥэ олорор пууннары тэрийсибиттэр, ойуурга, олорор секторга тахсыбыт баһаардары умуруорууга үлэлээбиттэр, тыаҕа муммут дьону көрдүүргэ күүс-көмө буолбуттар.

Евгений Григорьев сулууспаҕа эрэлэ улаханын биллэрдэ.