Саҥа оскуола-саад – сайдыы төрдө
Тэрээһиҥҥэ СӨ Бырабыыталыстыбатын бэрэссэдээтэлин бастакы солбуйааччы Кирилл Бычков, тутуу миниистирэ Павел Кылатчанов, куорат баһылыга Евгений Григорьев, о.д.а. кытыннылар.
5 тыһыынча кв. миэтэрэ иэннээх икки этээстээх оскуола-саад тутуута 2020 сыллаахха саҕаламмыта. Эбийиэк 2021 сыл ахсынньытыгар үлэҕэ киирэрэ былааннанар.
Евгений Григорьев бэлиэтээбитинэн, тутуу федеральнай, өрөспүүбүлүкэ уонна муниципальнай бүддьүөттэн үбүлэнэр. Билиҥҥи туругунан үлэ график быһыытынан барар, эбийиэк 57 % бэлэм. 
380 миэстэлээх Кангалаас оскуолата хаарбах туруктааҕынан биллэриллибитэ. Онон оҕолор икки эбийиэккэ үөрэнэргэ күһэллибиттэрэ. Микрооройуон дьаһалтатын салайааччыта Виктория Жилина саҥа оскуола-саад тутуллан бүтэрин нэһилиэнньэ долгуйа күүтэрин биллэрдэ.
П.С. Хромов аатынан Кангалаас орто оскуолатын дириэктэрэ Савелий Адамов билигин оскуолаҕа 189 оҕо үөрэнэрин, уһуйааҥҥа 90 кырачаан сылдьарын кэпсээтэ.
«Саҥа оскуола 220 миэстэлээх, оттон уһуйаан 100 оҕоҕо аналлаах. Ол да буоллар, оскуола эргэ дьиэтин хаалларар сорук турар. Биһиги оскуолабытыгар эдэр учууталлар, спортсменнар кэлэллэр. Саҥа уопсайы тутан, олорор дьиэ кыһалҕатын быһаарыахпыт этэ», – диэтэ оскуола дириэктэрэ.
Ил Дархан Айсен Николаев эбийиэк тутуутун тэтимин ыһыктыбаттарыгар соруйда. Ону таһынан «Шахтер» спорт саалатын дьиэтин чөлүгэр түһэрэр тоҕоостооҕун бэлиэтээтэ.
Сонуннар
Ордук ааҕаллар
