Саҥа оскуолаҕа билии аартыга арылынна

Балаҕан ыйын 2 күнүгэр Кэбээйи улууһун Мукучу нэһилиэгэр саҥа тутуллубут икки этээстээх таас оскуола аанын тэлэччи аһар  кэрэ бэлиэ түгэнэ үүннэ. Үөрэнэр кыһабыт «Үөрэҕирии» национальнай бырайыак чэрчитинэн, дойдубут Бэрэсидьиэнэ Владимир Путин, СӨ Ил Дархана Айсен Николаев, ону сэргэ СӨ Бырабыыталыстыбатын өйөбүллэринэн тутулунна.

Биллэрин курдук, Танара орто оскуолата – баай, дириҥ историялаах, үүнэр көлүөнэ ыччаты иитиигэ-үөрэтиигэ тус кылаатын киллэрсэн, айымньылаахтык, таһаарыылаахтык үлэлиир өрөспүүбүлүкэ биир кырдьаҕас оскуолата. Манна Новиковтар уонна Спиридоновтар учуутал династиялара үтүө үгэһи салҕаан, оҕону иитэр-такайар үлэ үөһүгэр сылдьалларын бэлиэтиир тоҕоостоох. Кэнчээри ыччат киэҥ билиилээх, эт-хаан өттүнэн сайдыылаах, олоххо бэлэмнээх киһи буолан, үүнүү-сайдыы аартыгар үктэнэригэр оскуола кэлэктиибэ кыһамньытын уурар. Ол курдук, быйыл сайын “Азия оҕолоро” оонньууларга спорт оскуола иитиллээччилэрэ Марк Антонов уонна Олег Кононов хапсаҕайга (тренер Иванов М. В.) чаҕылхай ситиһиилэнэн, төрөөбүт дойдуларын, бүтүн Саха сирин чиэһин көмүскээтилэр. Үөрэнээччилэрбит үрдүктэн үрдүк чыпчаалга дабайан, суоллара арыллан иһэриттэн нэһилиэк дьоно-сэргэтэ, үөрэппит учууталлара үөрэллэр, киэн тутталлар.

Мукучу нэһилиэгин дьоно-сэргэтэ, оҕо аймах уһун сылларга кэтэспит ыра санаабыт туолан, икки этээстээх таас оскуолабыт арыллар үөрүүлээх күнэ тосхойбутуттан долгуйабыт, бар дьоммутугар махтанабыт. Саҥа оскуолабыт билиҥҥи кэм ирдэбилигэр эппиэттиир үөрэнэр кабинеттардаах, лабораториялардаах, мастарыскыайдаах, көмпүүтэргэ дьарыктанар кылаастардаах, киэҥ-куоҥ, сырдык аактабай, спорт саалалардаах, оҕо доруобуйатын көрөр-истэр медкабинеттаах, библиотекалаах, парниктаах, о.д.а. тыа сирин усулуобуйатыгар сөп түбэһэр толору хааччыллыылаах.

Сайдыылаах үйэ тэтиминэн саҥа оскуолабыт тутуллан, алгыстаах  ыллыгынан, алтан чуораан тыаһынан ыраахтан-чугастан ыччаттарын ыҥыртаата. Үөрэх, билии аартыга үрдүккэ, сырдыкка угуйар ураты эйгэтэ арылынна! Бүтүн көлүөнэни иитэн-такайан таһаарбыт оскуолабыт барахсан үтүө үгэһэ салҕанан, үйэлэргэ аата-суола ааттана, үүнэ-сайда туруохтун!