Саҥа IT-кииннэр арыллыахтара

2021 сылга Саха сирин оройуоннарыгар эбии 5 IT-киин тэриллиэҕэ. Өрөспүүбүлүкэ ханнык оройуоннарыгар тутуллан киириэхтээхтэрэ муус устар 29 күнүттэн ыам ыйын 29 күнүгэр диэри ыытыллар куонкурус түмүгүнэн чуолкайдык быһаарыллыаҕа.

Санатан эттэххэ, Саха сиригэр IT-кииннэри тэрийэр үлэ 2018 сылтан  саҕаламмыта. Билигин  10 оройуоҥҥа үлэлииллэр: Сунтаар, Мэҥэ Хаҥалас, Нам, Орто Халыма, Ньурба, Уус Алдан, Хаҥалас, Мииринэй, Кэбээйи уонна Чурапчы улуустарыгар. Бу кииннэр информационнай технологиялар уобаластарыгар ыйан-кэрдэн уонна информационнай эйгэни көҕүлүүргэ үлэлииллэр. Ону сэргэ олохтоох тэрилтэлэргэ технологическай көмөнү оҥороллор уонна биир улахан өҥөлөрүнэн өрөспүүбүлүкэ баараҕай бырайыактарын олоххо киллэрсэллэр.

Куонкурус быраабылатын кытта СӨ Цифровой сайдыыга уонна инфокоммуникацияҕа министиэристибэтин сайтыгар билсиэххитин сөп. Онно биир сүрүн ирдэбиллэртэн биирдэстэринэн оройуон баһылыктарын өйөөһүҥҥэ  уонна IT-киин сайдыытыгар болҕомто ууруллар.

«Биһиги IT эйгэтин киин сирдэргэ эрэ буолбакка, тыа сиригэр эмиэ сайыннарарга үлэлиибит. Ааспыт сылга өрөспүүбүлүкэҕэ  7  IT-киин  аһыллыбыта.  2024 сылга өссө эбии 17 киини аһан үлэлэтэр соруктаах олоробут. Чопчулаан эттэххэ, кииннэри арыйыы  «Цифровая экономика» национальнай бырайыак иитинэн ыытыллар», — диэн цифровой сайдыы уонна инфокоммуникация миниистирэ Анатолий Семенов кэпсиир.