Саҥа хомунаалынай тиэхиньикэ кэлэн эрэр

Дьокуускайга саҥа хомунаалынай тиэхиньикэни аҕалыы саҕаланна. Ол курдук, бу күннэргэ сир үлэтигэр уонна уустук усулуобуйаларга анаммыт саҥа ДЗ-98В грейдер, ону сэргэ суол уонна саахал биригэдээлэригэр УАЗ массыыналар кэллилэр. Бу туһунан Олохтоох дьаһалта пресс-сулууспата иһитиннэрдэ.
Куорат баһылыга Евгений Григорьев бэлиэтээбитинэн, былырыын 119 хомунаалынай тиэхиньикэни ылар курдук улахан үлэ ыытыллыбыт. Итинник миэрэлэр суолу көрүү-истии хаачыстыбатын тупсарарга, төгүрүк суукканан уонна сылынан тохтоло суох үлэлиир хомунаалынай тиэхиньикэ пааркатын саҥардыыга уонна кэҥэтиигэ туһуламмыттар. 
«Хаарбах туруктаах хомунаалынай тиэхиньикэ элбэхтик алдьанар, ол иһин үлэ хаачыстыбата мөлтүүр, тэтимэ бытаарар. Итини таһынан, куоракка суолу тутуу уонна өрөмүөн көхтөөхтүк ыытыллар, сылын аайы саҥа уулуссалар суоллара, тротуардар эбиллэллэр. Балаһыанньаны тупсарар курдук хомунаалынай тиэхиньикэни улахан хабааннаахтык саҥардар туһунан быһаарыыны ылынныбыт», – диир  Инстаграм ситимигэр Евгений Григорьев.
Итини таһынан, 2022 сылга куорат салалтата уулуссалары хомуйуу ньымаларын саҥаттан көрөр санаалаах. 
«Ити хайысханан сүрүн түмүк уулуссаны сиппийэр массыына хас километры барбытынан буолбакка, уулусса төһө ырааһырбытынан көрүллүөхтээх», – диэн тоһоҕолоон бэлиэтиир куорат баһылыга.