Саҥа дьыллааҕы «Үтүөнү бэлэхтээ» дьаарбаҥкаҕа кыттыаҕыҥ!

Аһымал дьаарбаҥка сүрүн сыала – уустук балаһыанньаҕа түбэспит дьоҥҥо көмөлөһүү. Тэрээһин Дьокуускай куоракка, итиэннэ Мииринэй, Нерюнгри уонна Алдан оройуоннарыгар ыытыллар.

Дьаарбаҥка чэрчитинэн кыһалҕалаах дьоҥҥо гуманитарнай көмөнү хомуйуу, анал байыаннай дьайыы кыттыылаахтарын оҕолоругар көмө, «Баҕа санаа харыйата» уонна Алдаҥҥа «Оҕолорго оонньуурда бэлэхтээ» аахсыйалар ыытыллыахтара.

Итини таһынан, ХИФУ Мииринэйдээҕи политехническай институтун волонтер-устудьуоннара Тойбохойдооҕу дьиэ кэргэҥҥэ көмөлөһөр киин иитиллээччилэригэр көмөнү оҥоруохтара. Дьокуускайга ураты өҥөлөр, бородуукталар, кэмиэрсийэтэ суох уонна социальнай тэрилтэлэр бырайыактарын сүрэхтэниитэ буолуоҕа.

Гуманитарнай көмөнү хомуйуу маннык аадырыстарга оҥоһуллар:

Дьокуускай куорат, Курашов уул., 24, сэттис этээс, Уопсастыбаннай киин, билсэр төлөпүөн: 701-082; А. Е. Кулаковскай аатынан Норуоттар доҕордоһууларын дьиэтэ; «Саха сирин волонтердарын кытта үлэлиир киин» автономнай кэмиэрсийэтэ суох тэрилтэ, Орджоникидзе уул., 10.