Үс саха таптала

Бу ыйга өрөспүүбүлүкэбит үрдүнэн үбүлүөйдээх Үрүҥ тунах ыһыахтар ыытыллаллар. Мэҥэ Хаҥалас улууһун Холгума нэһилиэгэр бэс ыйын 15-16 күннэригэр саха норуотун тапталлаах ырыаһыта, П.А.Ойуунускай бириэмийэтин лауреата Марина Константиновна Попова-Эдьиий Марыына , литературнай кириитик, суруйааччы Егор Петрович Шестаков-Эрчимэн  үбүлүөйдээх 95 сылларынан, сопхуостар тэриллибиттэрэ 55 сылыгар, Саха АССР төрүттэммитэ 100 сылыгар аналлаах ыһыах буолан ааста.

Бэс ыйын 15 күнүгэр  «Үс саха таптала “ диэн саха норуотун тапталлаах ырыаһыта Эдьиий Марыына аатынан өрөспүүбүлүкэтээҕи ырыа күрэһин иккис түһүмэҕэ ыытылынна.  Бастакы түһүмэх кэтэхтэн ыам ыйыгар буолбута.
Бу күрэспит сыала соруга - Эдьиий Марыына ырыаларын үйэтитии, эдэр көлүөнэ ыччакка тарҕатыы, норуот ырыатын толорор талааннаах ырыаһыттары киэҥ эйгэҕэ таһаарыы.
Манна өрөспүүбүлүкэбит араас улуустарыттан 12 саастарыттан 17 саастарыгар дылы оскуола оҕолоро,  18-35 саастаах ыччат уонна 36 саастарыттан үөһээ улахан дьон кытыннылар.

Тыҥааһыннаах киирсии кэнниттэн Кылаан бириис Эдьий Марыына аймахтара-Давыдовтар анаабыт 30000 солк хаһайыынынан “Учууталбар»  диэн ырыаны толорон, Бүтэйдээхтэн Ньургуйаана Прокопьева буолла. Ону таһынан,  улахан дьоҥҥо 1-кы үктэл лауреата Бүлүүттэн  Семен Федоров (15000 солк), 2-с үрдэл лауреата Хара нэһилиэгиттэн Татьяна Степанова (10000 солк), 3-с үктэл лауреата Хорообуттан Петр Сергучев (8000 солк); ыччаттарга 1-кы үктэл лауреата Лоомтукаттан Виталий Никифоров (15000 солк), 2-с үктэл лауреата Майаттан Майя Дьячковская (10000 солк), 3-с үктэл лауреата Хараттан Мария Романова (8000 солк); оҕолорго 1-с үктэл лауреата Быраматтан Вова Слепцов (10000 солк), 2-с үктэл лауреата Төхтүртэн Надя Сметанина (8000 солк) уонна дипломаннарынан оҕолорго Аня Иванова (Тиэлиги), Кристина Слепцова (Бырама), Вася Захаров (Тиэлиги); ыччаттарга Дмитрий Иванов (Бырама), Виринея Арьянова (Тарат), Аграфена Дьячковская  (Бырама) сыаналаах бириистэринэн наҕараадаланнылар. 

Ону таһынан көрөөччү биһирэбилэ анал ааты Сыымахтан эдэр толорооччу Анна Жиркова (5000 солк), саамай кыра кыттааччы анал ааты Тиэлигиттэн Вася ыллылар.

Маннык күрэс биһиги нэһилиэкпитигэр бастакытын ыытыллар, саҥа саҕалааһын буолар. Бу бырайыагынан быйыл саас Арассыыйа бэрэсидьиэнин гранын ылан, саҥа музыкальнай аппаратура атыыластыбыт.
Бу күрэспит дьүүллүүр сүбэтин бэрэсэдээтэлэ Юрий Платонов аатынан Эстрада театрын солистката СӨ үтүөлээх артыыската Владлена Павловна Бурнашова-Сахая буолла. Ону таһынан Эдьиий Марыына аатынан Майатааҕы музыка оскуолатын директора В.Е.Захаров, СӨ култууратын үтүөлээх үлэһитэ Д.С.Санников, Эдьиий Марыына аатынан музыка оскуолатын преподавателэ С.К.Дьячковская, Култуура управлениетын култуураҕа уонна духуобунай сайдыыга методиһа Э.М.Павлова сыаналаатылар.

Тэрээһиммит спонсордарынан Мэҥэ Хаҥалас улууһун култуураҕа уонна духуобунай сайдыыга салалтата, Майатааҕы Эдьиий Марыына аатынан музыка оскуолата, Эдьиий Марыына аймахтара Поповтар, Давыдовтар буоллулар.
Эдьиий Марыына доҕотторо СӨ үтүөлээх артыыстара Сахая, Александр Бурнашовтар "Көрбүтүм эйигин ыһыахха” диэн бэйэлэрин кэнсиэрдэринэн сэргэхситтилэр, кыттыылаахтар, ыалдьыттар бука бары астына-дуоһуйа сынньаннылар, үөрэн-көтөн айаннаатылар.

Бука бары кыттыыны ылбыт, тэрийсибит дьоммутугар махтал истиҥ тылларын тириэрдэбит!
Үс саха таптала-Эдьиий Марыына ырыалара үс үйэ тухары ыллана турдуннар.