Сүрүн сорук – элбэх оҕолоох ыаллар сирдэригэр гааһы киллэрии

Дьокуускайга чааһынай дьиэлэргэ гаас ситимин киллэрии үлэтэ күүскэ ыытыллар. Быйыл Марха микрооройуонугар тутуу, монтаж үлэтэ оҥоһуллуоҕа.

Кэлэр сылларга элбэх оҕолоох ыалларга бэриллэр сирдэргэ гаас киллэрэр сүрүн сорук турар. 2020 сылга кыттыгас үбүлээһининэн “Севернай” кыбаарталга үлэ салҕаныаҕа. Онуоха, уопсайа 61,5 мөлүйүөн солкуобай көрүллүөҕэ. “2020-2024 сылларга хаачыстыбалаах дьиэнэн-уотунан хааччыйыы уонна олох-дьаһах коммунальнай өҥөлөрүн хаачыстыбатын тупсарыы” судаарыстыбаннай бырагыраама чэрчитинэн 44, 5 мөлүйүөн солкуобайдаах субсидия өрөспүүбүлүкэ бүддьүөтүттэн тыырылынна. Оттон киин куорат бүддьүөтүттэн 17 мөлүйүөн эбии үбүлэннэ.

Куорат хаһаайыстыбатын үлэлэтэр сулууспа иһитиннэрэринэн, Севернай микрооройуоҥҥа, Нам суолун 17 килэмиэтиригэр үс эбэтэр онтон элбэх оҕолоох ыалларга бэриллибит сир учаастактарыгар гааһы киллэриигэ аукцион ыытылынна. Бэдэрээтчигинэн “Восток Капитал” ХЭТ быһаарылынна. Муниципальнай хантараакка илии баттаныаҕа. Үлэ бастакы түһүмэҕэ алтынньы 1 күнүттэн саҕаланыаҕа, иккис түһүмэх – сэтинньи 1 күнүттэн.