Үс Эбэҕэ тэҥнээҕин булбата

Уус Алдан улууһун Тумулугар олорбут, баһылыктыы сылдьыбыт, ССРС, РСФСР, САССР үс тустуутун маастара, өрөспүүбүлүкэ үтүөлээх тренерэ Иннокентий Андреевич Халдеев кэриэһигэр 80 сааһын үбүлүөйүнэн Дьокуускайга “Дохсуҥҥа” ыытылынна. 

75-тэн үөһэ кг муҥутуур чемпионугар 150 тыһыынча солк. уу харчынан, оттон 75 диэри кг абсолютнай кыайыылааҕар 80 солк., ыйааһыннар чемпионнарыгар 15, иккис-үһүс миэстэлэргэ – 10, 5 тыһ. солк уу харчынан туттарылынна. Ону таһынан –  кинигэлэр, мэтээллэр, статуэткалар. Сүрүн спонсорынан Иннокентий Халдеев уола Андрей Халдеев салайар тэрилтэтэ “Интехстрой”, биир дойдулаахтара (Тумул баһылыга В.Алексеев) уонна тренер эрчийбит бөҕөстөрө, үтүөлээх тренердэр  Н.Константинов, Н.Крылов уо.д.а. Тумул аатын элбэхтик ааттатар Евгений биир дойдулааҕын аатынан “Халдеев хапсаҕайыгар” алтыс төгүлүн, бу сылга Эркээнигэ, Эҥсиэлигэ, аны ити Туймаадаҕа Аан Дархан аатын былдьаһыыга үстэ киирсэн, үһүөннэригэр тэҥнээҕин булбата.

Оттон 65 кг диэри абсолютнай кыайыылаах дьоһун бирииһин Чурапчыттан сылдьар, кэбээйиттэн төрүттээх Иван Семенов ылла. 

65 кг көҥүл тустууга РФ спордун маастара Айхаан Антонов (Ньурба) чемпионнаан аны хапсаҕайга СӨ маастара буолла.   

Атын чемпионнарынан хапсаҕайга элбэхтик истэр ааттарбыт буоллулар: Дмитрий Ушницкай, Игорь Софронеев, Александр Халыев, Николай Николаев, Илья Тимофеев, Айаал Павлов, Прокопий Петров, Айал Иванов, Александр Румин.