Руслан Тимофеев – куорат баһылыгын солбуйааччы

Бүгүн, муус устар 5 күнүгэр, куорат дьаһалтатыгар ыытыллыбыт планеркаҕа баһылык Евгений Григорьев саҥа солбуйааччылары анаабытын туһунан иһитиннэрдэ.

Руслан Тимофеев куорат баһылыгын солбуйааччытынан – Дьокуускай дьаһалтатын аппараатын салайааччытынан ананна. Оттон бу дуоһунаска үлэлээбит Алексей Корнилов территориялары сайыннарыыга баһылык солбуйааччытынан ааттанна.

Ыспыраапка

Тимофеев Руслан Владимирович 1983 сыллаахха олунньу 4 күнүгэр Саха АССР Ленинскэй оройуонун Ньурба бөһүөлэгэр күн сирин көрбүтэ. 2006 сыллаахха М.К. Аммосов аатынан Саха судаарыстыбаннай университетын бүтэрбитэ, историк, история учуутала идэлээх.

2016 сыллаахха Арассыыйатааҕы норуот хаһаайыстыбатын уонна судаарыстыбаннай сулууспа академиятын бүтэрбитэ. Судаарыстыбаннай уонна муниципальнай салайыы магистра. Кэргэннээх, үс оҕолоох.

Бу иннинэ Ыччат политикатын министиэристибэтигэр, Олохтоох дьаһалтаҕа специалиһынан, онтон араас салайар дуоһунастарга үлэлээбитэ. 2018-2019 сылларга СӨ Баһылыгын уонна Бырабыыталыстыбатын дьаһалтатыгар Информационнай политика уонна маассабай коммуникациялар департаменын салайбыта. 2019 сылтан «Конгресс-центр Якутия» судаарыстыбаннай автономнай тэрилтэ салайааччытынан үлэлээбитэ.