«Ростелеком» Щорс күөлүгэр биэс видеокамераны туруорда

«Ростелеком» хампаанньа Щорс күөлүгэр баар «Лебединое озеро» экологическэй пааркаҕа босхо биэс видеокамераны туруорда. Билигин паарканы бас билээччи территорияны төгүрүк суукканан кэтээн көрөр кыахтанна.  
«Лебединое озеро» экологическэй паарка Щорс күөлүгэр 2016 сылтан үлэлиир. Бу миэстэ куорат олохтоохторун уонна ыалдьыттарын сөбүлээн сынньанар сирэ. Сайын аайы күөлгэ кустары, хаастары уонна кубалары дуоһуйа көрүөххэ сөп. Ол эрэн, кэнники кэмҥэ кэрээнэ суох дьон көтөрдөрү өлөрөр түбэлтэлэрэ тахсан, бырайыагы бас билээччи Юрий Борисов паарка үлэтин тохтотор туһунан толкуйдаабыта. Экологическэй пааркаҕа урут баар видеонан кэтээн көрүү камераларын ситимнэрин бу кыһын быһыта тыыппыттар, оттон  харабыл тутарга үп суох эбит. 
«Ростелеком» хампаанньа паарка үлэтин салгыырын курдук көмөлөһөргө быһаарыммыт. Ол курдук, бары өттүттэн кэтээн көрөргө табыгастаахтык биэс камераны туруорбут. Көтөрдөр ууга уста сылдьар дьиэлэрин үрдүгэр куполлаах камераны туруораары, уу аннынан ситими тардан камераны үөһээ иилбиттэр. 
«Туох буолбутун истэн баран, туора турбакка, Юрий Петрович куорат олоҕор суолталаах бырайыагар көмөлөһөргө быһаарыммыппыт. Кэтээн көрүү систиэмэтэ паарка бас билээччитигэр буола турар быһыыны-майгыны ыраахтан хонтуруоллууругар көмөлөһүө. Интернет баар сиригэр хантан баҕарар – компьютерынан, ноутбугунан, планшетынан эбэтэр смартфонунан кэтээн көрүөххэ сөп. Туох эбит буолар түбэлтэтигэр систиэмэ тута паарка хаһаайыныгар биллэрии ыытар», - диир «Ростелеком» ПАУо «Сахателеком» филиалын дириэктэрэ Константин Войтеховскай.
«“Ростелеком” хампаанньа көҕүлээһинин уонна көмөтүн иһин махтанабын. Билигин долгуйбакка суукка хайа баҕарар кэмигэр ыраахтан хонтуруоллуур кыахтанным. Кэлэ сатаабакка ыраахтан кэтии олорор наьаа табыгастаах. “Ростелеком” көмөтүнэн видеокамера көрдөрүүтэ ханнык баҕарар сайтка тахсыан сөп. Сатаннаҕына, итиннэ үлэлэһэр киһини буллахпына, күөлгэ туох буола турарын дьон дьиэҕэ олорон көрөр буолуохтарын сөп», - диэн кэпсиир паарка дириэктэрэ Юрий Борисов.
Итини таһынан паарка бэсиэдкэлэригэр Wi-Fi ситимигэр холбонуохха сөп буолбут.