30.05.2024 | 18:00

«Roblox Studio» маастар-кылааһа бастакы олугу оҥорор

«Roblox Studio» маастар-кылааһа бастакы олугу оҥорор
Ааптар: Айталина СОФРОНОВА
Бөлөххө киир

Бу күннэргэ өрөспүүбүлүкэ  үрдүнэн “Креативнай нэдиэлэ” буола турар. Дьокуускай куорат «Якутия» технопаарката аһаҕас аан күннэрин биллэрэн, араас маастар-кылаастары, үөрэх куурустарын, быыстапкалара уо.д.а. атын тэрээһиннэри ыытта. «Киин куорат» хаһыат «Expo Skills” IT-оскуолата маастар-кылааһын тиийэн көрдө, кыттааччылары кытта билистэ.

Маастар-кылааска уонтан тахса оҕо кэлэн, «Expo Skills” хампаанньа тэрийбит «Roblox Studio” кроссплатформеннай оонньуур движок бырагырааматыгар үөрэх аастылар. Манна кинилэри уопуттаах учуутал Дьулустан Никаноров үөрэттэ.

— Мин Мэҥэ хаҥалас улууһун Наахара нэһилиэгиттэн сылдьабын. Оҕолору эбии дьарыгынан сайыннарыыга 2022 сылтан үлэлиибит. Биэс интэриэһинэй хайысхалаахпыт: 3D-моделировние, дизайн, сайт оҥорорго үөрэтэбит уонна, биллэн турар, оонньуу айарга уһуйабыт. Бу сибилигин Дьокуускай куорат алын кылааһын оҕолоругар «Roblox Studio” кроссплатформеннай игровой движок бырагырааматыгар оонньуу оҥорорго үөрэтэбит. Мин көрүүбэр, билиҥҥи оҕолор бары кэриэтэ «Robloх" оонньууллар, онон бу салааны бары интэриэһиргииллэр диэххэ сөп. “Roblox” бырагыраама үчүгэйэ диэн, саҥа оонньууну айарга, оҥорон таһаарарга кыахтары биэрэр, бу бырагырааманы кыра оҕолор кытта сөбүлүүллэр.

— Туох үчүгэй өрүттэрдээҕий?

— Оҕолор бу оонньууга сынньаналлар диэххэ сөп. Толкуйдуур дьоҕурдарын, креативнай өйдөрүн-санааларын эмиэ сайыннараллар, туочунай наукаларга – геометрия, математика курдук салааларга төбөлөрө түргэнник үлэлиир буолар. Дьарыктарбыт бырагыраамалара сыыйа ыараан иһэр, онон күүстээх IT-исписэлиис буолуохтарын баҕарар оҕолор, чулуу спортсменнар курдук, кыра саастарыттан дьаныардаахтык дьарыктанарга бэлэм буолуохтарын наада дии саныыбын. Маны сэргэ, биллэн турар, билиини бэйэлэрэ ирдэһэн ыларга кыһаллыахтаахтар. Билиҥҥи оҕолор интэриниэти хаардыы хааман сылдьаллар эрээри, кинилэргэ сөптөөх источниктары, туһалаах балаһааккалары ыйан-кэрдэн биэрэр киһи хайаан да наада, оннооҕор кинигэттэн хайдах туһалаах иһитиннэриини булары кытта үөрэтэбит.

— Expo Skills IT-оскуола хаһааҥҥыттан үлэлиирий?

— Биһиги 2022 сылтан үлэлиибит, салайааччыбыт биллэр айтишник Николай Потапов. Оскуолабыт биир улахан сүрүн сыала-соруга – үүнэр көлүөнэни аныгы технологиялары кытта билиһиннэрии уонна  бу идэҕэ оҕо интэриэһин тардыы. 

— Атын оскуолалартан туох уратылааххытый?

— Бөлөхпүтүгэр аҕыйахтыы оҕону ылан үөрэтэбит, кинилэргэ барытын сиһилии кэпсиибит, оҕону кытта атах тэпсэ олорон үлэлиибит. Биир бөлөх – түмсүүлээх хамаанда.Аҕыйахтыы оҕону ылан дьарыктыыр учууталга эрэ буолбакка, төрөппүккэ эмиэ табыгастаах. Тоҕо диэтэххэ, оҕолорго набор бүтэн хаалбат, саҥаттан саҥа, үстүү-түөртүү оҕоттон бөлөхтөрү тэрийэн иһэбит.

Маастар-кылаас кэннэ үөрэнээччилэр санаалара

Артем Слепцов, киин куорат 29-с №-дээх оскуолатын иккис кылааһын үөрэнээччитэ:

Мин бүгүн бастакы күммүн үөрэнним, сөбүлээтим диэххэ сөп. Улааттахпына биллэр IT-исписэлиис буолар былааннаахпын, баҕа санаам туоларыгар дьулуһабын аҕай, кыһаллыам. 

 

Алтаана Гармаева, киин куорат гуманитарнай оскуолатын бастакы кылааһын үөрэнээччитэ:

Миэхэ маҥнай ийэм эппитэ, босхо үөрэх кууруһа баар диэн. «Roblox” онлайн-платформатыгар дьиэ туттум, бу оонньууну оҕо барыта сатыыр дии, мин эмиэ сатыахпын баҕарабын. Оскуолабын бүтэрдэхпинэ, оҕо уһуйааныгар үлэлиэхпин эбэтэр повар буолуохпун баҕарабын.

 

Дайаана Тихонова, киин куорат 29-с №-дээх оскуолатын иккис кылааһын үөрэнээччитэ:

Киин куорат IT-пааркатыгар аан бастаан кэллим, наһаа улахан дьиэ эбит. Биһигини учууталбыт олус үчүгэйдик көрүстэ, элбэҕи биллим. Инникитин бу хайысхаҕа өссө да дьарыктанар былааннаахпын.

 

Алексей Орехов, киин куорат 2-с №-дээх оскуолатын төрдүс кылааһын үөрэнээччитэ:

Манна маастар-кылаас ыытылларын убайым эппитэ, кини бэйэтэ IT-эйгэтин сэҥээрэр. Мин эмиэ IT хайысхатынан сайдыахпын-үүнүөхпүн баҕарабын. Оскуолабын бүтэрдэхпинэ, программист буолар былааннаахпын.

Expo Skills IT-оскуолатыгар үөрэх куурустара кылгас болдьохтоохтор, аччаабыта биэс-алта ыйга тиийэр.  Дьулустаан этэринэн, дьарык бириэмэтэ оҕо бырайыагын хайдах ситиһэриттэн тутулуктаах. Бастакы ыйдарга оҕолор учууталы кытта тэҥҥэ үлэлииллэр. Онтон кэлэр ыйдарга бэйэлэрэ хасыһан, толкуйдаан үлэлии үөрэнэллэр. Уопсай түмүккэ бырайыактарын дьүүллүүр сүбэ иннигэр көмүскээн, үөрэх кууруһун бүтэрбиттэрин туһунан туоһу сурук туталлар.
Бу курдук боруобалыыр уруоктар ыытыллар буоланнар, баҕалаах оҕо барыта бэйэтин IT эйгэтигэр холонон көрөр кыахтаах.
Бүгүҥҥү үөрэх түмүгүнэн хас даҕаны оҕо Expo Skills сайыҥҥы лааҕырыгар сылдьар баҕалааҕын биллэрдэ.
Бу көстөр үөрэх кэбиниэтигэр уопсайа түөрт хайысха тэҥҥэ олорон үөрэнэллэр.

Сонуннар

Ордук ааҕаллар

Татьяна Гоголева:  «Төрөөбүт тылын билбэт ыччат ханна да сыаналаммат»
Дьон | 13.06.2024 | 10:00
Татьяна Гоголева: «Төрөөбүт тылын билбэт ыччат ханна да сыаналаммат»
«Хотугу сулус» оҕо телерадиоакадемиятын төрүттээбит, үгүс көлүөнэ талааннаах ыччаты көччөх гынан көтүппүт Татьяна Гоголева, чахчы, Саха сиригэр тыыннаах номох буолбут киһи. СӨ култууратын үтүөлээх үлэһитэ, СӨ култууратын, социальнай эйгэтин туйгуна, «Гражданскай килбиэн» бэлиэ хаһаайына олоҕун тухары оҥорбута, айбыта-туппута, үйэтиппитэ үгүс.   Кини туһунан бу иннинэ сурулунна ини, суруллубата ини. Ол эрээри...
“Сүүрэр суолга – Владимир Слепцов!”
Спорт | 18.06.2024 | 14:15
“Сүүрэр суолга – Владимир Слепцов!”
Спорт көрүҥнэриттэн биир бастыҥнара уһун сиргэ сүүрүү. Ырааҕы сүүрүүнэн ылбычча киһи дьарыктаммат. Бэйэтин кэмин аатырбыт сүүрүгэ-быһыйа, Саха АССР рекордсмена, стайер уонна марафонец Владимир Слепцову ааспыт үйэ 60-80 сылларын дьоно үчүгэйдик өйдүүр-билэр. Быйыл рекорд олохтообута лоп-курдук 50 сыла. Аҕаларын, эһэлэрин кэриэстээннэр оҕолоро, сиэннэрэ, бииргэ төрөөбүт балта  Людмила Пантелеймоновна, быраата Артем Пантелеймонович...
ЭкоБизнес —  Айылҕаҕа харыстабыллаах  сыһыаҥҥа тирэҕирэн
Дьон | 14.06.2024 | 14:00
ЭкоБизнес — Айылҕаҕа харыстабыллаах сыһыаҥҥа тирэҕирэн
Дьокуускайга бизнес араас хайысхата сайдар. Олохтоох бородууксуйаны оҥорон атыыга таһаарыы ордук элбэх эбит буоллаҕына, туризм курдук өҥөнү оҥорор предпринимателлэр тарбахха баттаналлар. Юлиана уонна Захар Алексеевтар элбэх оҕолоох дьиэ кэргэн Дьокуускай таһынааҕы Капитоновка сэлиэнньэтигэр туристическай бизнеһи сайыннаран эрэллэр.   Оҕолор улааттылар диэн саҕалаабыппыт – Биһиги үс уоллаахпыт. Улахаттарбыт 14 саастарын туолбуттарын кэннэ,...
Олоҥхо ыһыаҕар анаан Дьокуускайтан айанныыр паром ахсаана элбэтиллэр
Сонуннар | 14.06.2024 | 10:17
Олоҥхо ыһыаҕар анаан Дьокуускайтан айанныыр паром ахсаана элбэтиллэр
XVII-с өрөспүүбүлүкэтээҕи Олоҥхо ыһыаҕа быйыл бэс ыйын 20-21 күннэригэр Аммаҕа Муона чараҥа айылҕа маанылаах миэстэтигэр ыытыллаары турар.  Ыһыах мааны ыалдьыттарынан өрөспүүбүлүкэ 32 муниципальнай тэриллиититтэн 15 тыһыынчаттан тахса киһи буолуоҕа. Айанньыттарга анаан «Дьокуускай – Аллараа Бэстээх» хайысханан 15 паром сылдьыаҕа, Амма сэлиэнньэтин иһинэн оптуобустар, ыһыах түһүлгэтигэр тиэрдэр шатллар сүүрүөхтэрэ. Түһүлгэҕэ 3...