07.06.2024 | 12:00

Үөрэнээччилэр спартакиадалара

Үөрэнээччилэр спартакиадалара
Ааптар: Баһылай ПОСЕЛЬСКАЙ
Бөлөххө киир

Өрөспүүбүлүкэ үөрэнээччилэрин спартакиадата бэс ыйын 6-10 күннэригэр спорт 29 көрүҥэр 35 улуустан 1700 оҕо кыттыылаах буолуоҕа. 

Бу туһунан билиһиннэрэр пресс-конференцияны Саха Өрөспүүбүлүкэтин үөрэххэ уонна наукаҕа миниистирин солбуйааччы Альбина Аргунова, “Спортивные якутяне” Киин дириэктэрин солбуйааччы Александр Брызгалов уонна Спартакиада сүрүн судьуйата Юрий Балаганскай иһитиннэрдилэр. Спартакиада кыайыылаахтарыгар туттарыллыахтаах Кубоктар, мэтээллэр, спортсменнар экипировкалара көрдөрүлүннүлэр.

Александр Романович иһитиннэрбитинэн, Саха сирин үөрэнээччилэрин Спартакиадата коронавируһунан сибээстээн биэс сыл тохтотуллан баран, былырыын 2023 с. Ил Дархан Айсен Сергеевич Николаев дьаһалынан сөргүтүллүбүтэ. Оскуолаларга, улуустарга уонна өрөспүүбүлүкэ финалыгар үс түһүмэҕинэн ыытыллан, 63 тыһ. тахса оҕо кыттыыны ылбыта. Спартакиада сүрүн сыала-соруга: хас биирдии оскуолаҕа күрэхтэһии тыына биллэн, элбэх оҕо физкултууранан уонна спордунан дьарыктанарын, чөл, чэгиэн-чэбдик сылдьарын ситиһии. Билигин Спартакиада 29 көрүҥүттэн 20-чэтэ түмүктэннэ. Хаалбыт көрүҥнэр финаллара бэс ыйын 6 – 10 күннэригэр чэпчэки атлетикаҕа, көҥүл тустууга, боксаҕа, гиирэ спордугар, оҕунан ытыыга, мас тардыһыытыгар, дуобакка, саахымакка ыытыллыахтара. Күрэхтэһиилэр Дьокуускай куорат спорка эбийиэктэринэн, “Модун”, “Триумф”, Дуобат-саахымат дыбарыастарыгар, университет УЛК уонна тустууга саалаларыгар, Хатаска саҥа тутуллубут спорт комплексыгар, Музыка үрдүкү оскуолатыгар, Горнай улууһун Бэрдьигэстээх “Чыпчаал” стадионугар буолуохтара. Быйыл гиирэ спорда уонна доруобуйаларыгар хааччахтаах адаптивнай спорт чэпчэки атлетикаҕа икки көрүҥэ эбиллэн биэрдилэр.

Бастаабыт хамаанда – 250 тыһ. солк., иккис, үһүс миэстэлэри ылаттаабыттар туһааннааҕынан – 150 уонна 100 тыһ.солк., спорт биирдиилээн көрүҥнэригэр чөмпүйүөн оҕолору бэлэмнээбит тренердэр 100 тыһ.солк. бириэмийэлэниэхтэрэ.

Оскуола оҕолорун ахсааннарынан түөрт бөлөх баар. Былырыын I бөлөххө  –Дьокуускай, Мэҥэ Хаҥалас, Сунтаар; II бөлөххө – Уус Алдан, Үөһээ Бүлүү, Амма; III бөлөххө – Кэбээйи, Уус Майа, Булуҥ;  IV бөлөххө Эдьигээн, Өлөөн, Муома улуустара туһааннааҕынан бастакы, иккис, үһүс миэстэлэри ылаттаабыттара.

Спартакиада түмүгүнэн Саха Өрөспүүбүлүкэтин хамаандалара сүүмэрдэнэннэр, Арассыыйа үөрэнээччилэрин спартакиадатыгар барыахтара. Ону таһынан биирдиилээн көрүҥнэр, итиэннэ ГТО многоборьетын кыайыылаахтара Арассыыйа үөрэҕин министиэристибэтин иһинэн спорт кулууптарын Бүтүн Арассыыйатааҕы түһүмэҕэр күрэхтэһиэхтэрэ. Бастыҥнар “Азия оҕолорун” Оонньууларыгар эмиэ кыттыахтара.

Өрөспүүбүлүкэ үөрэнээччилэрин спартакиадатын үөрүүлээх аһыллыыта уонна сабыллыыта “Доҕордоһуу” болуоссатыгар буолуоҕа.

Түмсүүлээх, тэрээһиннээх, үчүгэй бэлэмнээх хамаандаларга ситиһии тосхойдун!

Сонуннар

Ордук ааҕаллар

Дьикти түбэлтэ
Сынньалаңңа | 01.06.2024 | 17:00
Дьикти түбэлтэ
Уйбаан Уйбаанабыс сураҕа суох сүппүтүн туһунан сурах нэһилиэги биир гына тилийдэ. Сарсыарда олус хойуу сиик түспүт этэ. Ойоҕо халдьаайыттан көрөн турдаҕына, эр киһи алааһы бүтүннүү тарҕаммыт күдэрик тумаҥҥа ынахтарын көрдүү киирбитэ уонна ол кэнниттэн ууга тааһы бырахпыттыы мэлийбитэ... Дьахтар бу киһи туман түспүтүн туһанан арыгыһыт доҕотторун диэки сүүрбүт дии санаан,...
Умнуллубут аспытын сөргүтүөххэ
Тускар туһан | 01.06.2024 | 18:00
Умнуллубут аспытын сөргүтүөххэ
Оскуолалар, уһуйааннар ыһыахтара үгэннээн тураллар. Сотору улахан ыһыахтар кэлиэхтэрэ. Ону кытта сахалыы сандалыбытыгар тугу астыырбытын былаанныыбыт. Үгэс буолбут бүлүүдэлэртэн хал буолбут буоллаххытына, өбүгэлэрбит умнулла быһыытыйбыт астарын сөргүтэргэ ыҥырабыт.   Искэхтээх эбэтэр хааннаах алаадьыэ Алаадьы тиэстэтигэр ханнык баҕарар бөдөҥ балык искэҕин кутан буһардахха, ураты уонна тотоойу бүлүүдэ буоларын билэбит. Оттон сорох хотугу...
Былатыан Эверстов:  «Элбэх дьоҥҥо сонуну кэпсиир кыахтаах буолар — дьол»
Дьон | 06.06.2024 | 10:00
Былатыан Эверстов: «Элбэх дьоҥҥо сонуну кэпсиир кыахтаах буолар — дьол»
Хас сир аайы ураты дьон баар буолар. Кинилэр олохторун хара маҥнайгыттан атыннык олоро сатыыллар. Барыларыгар баар курдук нус-хас дьылҕаҕа дураһыйбаттар. Оннук дьикти киһинэн Дьааҥы улууһугар олорор эрээри, өрөспүүбүлүкэ, дойду, аан дойду үгүс бэлиэ спортивнай түгэннэрин көтүппэккэ хамнаһа суох сырдатар суруналыыс, киэҥ сырыылаах айанньыт, коллекционер, фотограф, спортсмен, норуот тапталын ылбыт Платон...