Рекорд үөһэ рекорд!

Аатырбыт дэгиттэр спортсмен  Василий Николаев кэриэһигэр атах оонньууларыгар өрөспүүбүлүкэ чемпионата элбэх саҥа рекордааҕынан историяҕа киирдэ. Өрөбүллэргэ  «Туймаада» стадиоҥҥа 13 улуус,   Дьокуускай, ХИФУ,   АГАТУ ааттарыттан 40 спортсмен  кытынна. Биир  ыйынан  Манчаары оонньуулара буолаары турарынан, спортсменнар эрчиллиилэрин күүһүрдүбүттэрэ ырааттаҕа.  

ЯПК 1 кууруһун устудьуона, сабыылаах сиргэ күрэхтэһиигэ өрөспүүбүлүкэ рекордсмена  Валерия Олесова үс көрүҥ түмүгүнэн дьахталларга бастаата, өрөспүүбүлүкэ рекордарын таблицатыгар аатын үстэ суруйтарары ситистэ: 20-гэр диэри саастаахтарга суумаҕа (66 м 74 см),  кылыыга (24 м 75 см), ити кылыйыыта 23-гэр диэри саастаахтар рекордарын эмиэ куоһарда. 

Саастаахтарга урукку рекордсмен Виталий Васильев (Ньурба) утарсааччыларыттан ойуччу ыраах түһүтэлээтэ. Үс көрүҥ сууматыгар чугастааҕыттан 5 аҥаар миэтэрэ чорбойдо.

Эр дьоҥҥо  25 күрэхтэһээччиттэн 14-дэ маастар.

Ыстаҥаҕа  Кай Адамов өрөспүүбүлүкэ рекордун ааһа түһэн уруйданна –  47 м 43 см тиэртэ.

 “Куобахха” Тааттаттан Андрей Васильев бэйэтин өрөспүүбүлүкэтээҕи  рекордун ыраатыннарда – 43 м 16 см!

Эрэл Тихонов 41м 25 см куобахтаан,  23-гэр диэри саастаахтарга өссө биир рекорду эбэн биэрдэ!

Троеборье сууматыгар  муҥутуур кыайыылааҕынан  Кай Адамов буолла – 133 м. Киниттэн миэтэрэттэн кыра ордугунан хаалан, Андрей Васильев (131 м 70 см),  Ньургун Сокольников (129 м 50 см) үһүс миэстэлэргэ таҕыстылар. Сокольников барыта үс рекордун соргуланна: 20-гэр диэри ыстаҥаҕа  — 45м 49 см, «куобахха» — 38 м 90 см уонна троеборьеҕа — 129 м 50 см