Үөрэх дьылын көрсө 38 оскуола өрөмүөннэниэҕэ

Быйылгы үөрэх дьылыгар 15 улуус уонна Дьокуускай куорат 38 оскуолаларыгар хапытаалынай өрөмүөн ыытылларын туһунан өрөспүүбүлүкэ премьера Андрей Тарасенко профильнай биэдэмистибэлэри кытта мунньах түмүгүнэн иһитиннэрдэ.

«Үөрэх саҕаланыар диэри өрөмүөн үлэтэ түмүктэниэхтээх, тутуу матырыйаалларын хомуйуу, үлэ хаачыстыбатын бэрэбиэркэлээһин ыытыллыахтаах. Ил Дархан Айсен Николаев бэрээтчиттэргэ өрөмүөнү тэтимирдэр соругу туруорарга уонна үлэ хаачыстыбатыгар болҕомтону уурарга сорудахтаата», – диэтэ Андрей Тарасенко.

Балаҕан ыйыгар диэри өрөмүөн Алдан, Амма, Булуҥ, Үөһээ Бүлүү, Бүлүү, Кэбээйи, Мэҥэ Хаҥалас, Муома, Нам, Ньурба, Өймөкөөн, Сунтаар, Томпо, Уус Алдан, Хаҥалас улуустарыгар уонна Дьокуускай куоракка түмүктэниэхтээх. Билигин оскуолалар бэлэмнэрэ ортотунан 82%.

Улахан болҕомто Булуҥ улууһун Тиксиитээҕи 1 №-дээх оскуолаҕа ууруллар, итиннэ эбийиэк  баара-суоҕа 39% бэлэмнээх. Премьер туһааннаах министиэристибэлэргэ суһаллык бэдэрээтчит тэрилтэни уларыталларыгар сорудахтаата.

Билиҥҥи туругунан өрөмүөн үлэтэ 25 муниципальнай тэриллии уонна уокуруктар 58 эбийиэктэригэр ыытыллар, итинтэн сороҕо быйыл, сороҕо 2023 сылга түмүктэнэр. Икки сыллаах бырагыраамаҕа өрөмүөнү сэргэ малынан, тэрилинэн хааччыйыы киирэр.