Үөрэҕирии управлениетын саҥа начаалынньыга ананна

Олохтоох дьаһалта Үөрэҕириигэ управлениетын начаалынньыгынан 2022 сыл ыам ыйын 12 күнүттэн педагогическай наука хандьыдаата, юрист, филолог,  салайар каадырдары бэлэмниир Бэрэсидьиэн бырагырааматын «Управление развитием бизнеса» хайысханан үөрэнэн бүтэрбит Петрова Мария Петровна ананна. 
Уопсай ыстааһа – 34 сыл, итинтэн үөрэҕирии эйгэтигэр 25 сыл үлэлээтэ.
Мария Петрова 2015 сылтан «Республиканский ресурсный центр «Юные якутяне» ГАНОУ эбии үөрэхтээһиҥҥэ регионнааҕы модельнай киин дириэктэринэн үлэлээбитэ. Киин эбии үөрэхтээһин систиэмэтин, оҕо биир кэлим хамсааһынын уонна өрөспүүбүлүкэҕэ оҕолору  гражданскай-патриотическай иитии сайдыытын сүрүннүүр. Петрова М.П. салалтатынан 2016-2018 сылларга өрөспүүбүлүкэҕэ эбии үөрэхтээһин саҥа федеральнай бырайыактара олоххо киирбиттэрэ,  «Кванториум» Республики Саха (Якутия)» оҕо технопаарката арыллыбыта уо.д.а үлэ ситиһиилээхтик ыытыллыбыта. 
2019 сыл олунньу ыйыттан Мария Петрова «Фаина Иннокентьевна Авдеева аатынан Оҕо айымньытын дыбарыаһа» МАНОУ салайааччытынан үлэлээбитэ. Кини элбэх социальнай суолталаах, гырааннаах бырайыактары көҕүлээбитэ, холобур, «Кружок математики и информатики «IT-школа БИНОМ», «Гончарный круг надежды», «Юные экологи Севера», «Киберволонтеры. ЯКТ» уо.д.а. 
Мария Петрова улахан уопсастыбаннай үлэни ыытар. Кэккэ сылларга «Воспитание – всем обществом» өрөспүүбүлүкэтээҕи уопсастыбаннай хамсааһыны, «Всероссийское педагогическое собрание» регионнааҕы салааны салайбыта. Кини Дьокуускай куорат уопсастыбаннай палаататын бэрэссэдээтэлин солбуйааччы, «Матери России» ВОД регионнааҕы салаатын президиумун чилиэнэ.