Үөрэҕирии Управлениетын начаалынньыга целевой туһаайыылаах устудьуоннары кытта көрүстэ

Атырдьах ыйын 20 күнүгэр  «Айыы Кыhата» Национальнай гимназияҕа куораттааҕы үөрэҕирии Управлениетын начаалынньыга Алексей Семенов целевой туһаайыылаах педагогическай үрдүк үөрэх кыһаларыгар киирбит устудьуоннары кытта көрүстэ.   
Быйыл үөрэҕирии Управлениета педагогическай идэлэргэ Арассыыйа бастыҥ үрдүк үөрэҕин кыһаларыгар киирбит 38 абитуриены кытта целевой туһаайыылаах дуогабардары түһэрсибит. 
«Дуогабар чэрчитинэн үөрэҕирии Управлениета педагогическай быраактыканы тэрийэр, уопуттаах педагогтары наставник быһыытынан сыһыарар, үөрэхтэрин бүтэрдэхтэринэ үлэҕэ киллэрэр. Итини таһынан, үөрэнэр кэмнэригэр устудьуоннар босхо целевой курсовой бэлэмнэниини ааһаллар», – диир Алексей Семенов.
Тэрээһин модератора,  үөрэҕирии Управлениетын начаалынньыгын солбуйааччы Тамара Попова, кыттааччылары целевой хайысханан үлэ түмүктэрин кытта билиһиннэрдэ. Ол курдук, М.К. Аммосов аатынан Хотугулуу-Илиҥҥи федеральнай университекка – 29, А.И. Герцен аатынан Арассыыйатааҕы судаарыстыбаннай педагогическай университекка – 2, Уһук Илиҥҥи федеральнай университекка – 5, Москватааҕы  педагогическай судаарыстыбаннай университекка – 1, Сибиирдээҕи потребительскай кооперация университетыгар – 1 киһи үөрэнэ киирбиттэр.
Итини сэргэ, Тамара Попова устудьуоннар уонна сакаасчык иннигэр турар үлэ сыһыаннарын уонна эбээһинэстэрин туһунан кэпсээтэ, 4 сыл тухары үөрэҕирии Управлениета бииргэ үлэлэһэрин бэлиэтээтэ. 
«Айыы Кыhата» Национальнай гимназия дириэктэрэ Лидия Шамаева, П.Н. уонна Н.Е. Самсоновтар ааттарынан Хатастааҕы орто оскуола дириэктэрэ Николай Слепцов, 6 №-дээх орто оскуола дириэктэрин солбуйааччы Александра Ушницкая, үөрэҕирии Управлениетын каадыры кытта үлэҕэ салаатын начаалынньыга Елена Николаева устудьуоннарга сөптөөх сыалы туруоран инники өттүгэр өссө сайда туралларыгар баҕардылар. 
Көрсүһүүгэ устудьуоннар кинилэри долгутар ыйытыктары биэрдилэр уонна үөрэҕирии Управлениетыгар талбыт үөрэхтэригэр киирбиттэрин иһин махталларын тиэртилэр.