Үөрэҕирии тэрилтэлэригэр куттал суох буолуутун күүһүрдэр үлэ ыытыллар

Пермь куорат судаарыстыбаннай национальнай-чинчийэр университетыгар буолбут алдьархай кэнниттэн Дьокуускай куорат баһылыга Евгений Григорьев киин куорат социальнай эбийиэктэрэ төһө көмүскэллээхтэрин анаалыстыырга сорудахтаата. Бу туһунан Уокуруктааҕы дьаһалта пресс-сулууспата иһитиннэрдэ.  
«2022 сыллааҕы бүддьүөтү былааннааһыҥҥа уонна оҥорууга ыытыллыбыт анаалыс түмүгүнэн итэҕэһи туоратарга эбии үбүлээһин көрүллэрэ ирдэнэр», — диэн бэлиэтээбит куорат баһылыга.
Үөрэҕирии управлениетын үлэ харыстабылыгар уонна куттал суох буолуутун хааччыйыыга начаалынньыга Евгений Затеев иһитиннэрбитинэн, бүгүҥҥү күҥҥэ управление иһинэн үлэлиир бары үөрэҕирии тэрилтэлэрэ бэрэбиэркэлэммиттэр, куттал суох буолуутун пааспардара УФСБ, Росгвардияны, ЫБММ кытта сөпсөһүүнү ааспыттар. 
«Бэрэбиэркэ түмүктэринэн булуллубут сүрүн итэҕэстэр: бастакытынан, оҕо уһуйааннарыгар харабыл суох. Иккиһинэн, видеонан кэтээн көрүү систиэмэлэрин саҥардыы ирдэнэр, ону сэргэ видеокамера ахсаана аҕыйах», — диэбит Евгений Затеев.
Кини иһитиннэрбитинэн, үөрэҕирии тэрилтэлэрин территорияларыгар өрөмүөн ыытыллара, периметр устунан хааччахтааһын туруоруллара былааннанар. 
«Билиҥҥи кэмҥэ муниципальнай үөрэҕирии тэрилтэлэригэр куттал суох буолуутун бөҕөргөтөр тэрээһиннэр былааннара (суол каартата) ситэрэн оҥоһуллар, ол иһигэр оҕо уһуйааннарын домофоннарынан хааччыйыы киириэҕэ», — диэн бэлиэтээбит Затеев.
Үлэ «Об утверждении требований к антитеррористической защищённости объектов (территории) Министерства просвещения РФ и объектов (территорий), относящихся к сфере деятельности Министерства просвещения РФ, и формы паспорта безопасности этих объектов (территорий)» диэн РФ бырабыыталыстыбатын 2019 сыл атырдьах ыйын 2 күнүнээҕи уурааҕар олоҕуран ыытыллар.