Үрдүк үөрэх кыһаларыгар бүддьүөт миэстэтэ элбээтэ

2022 сылга Саха сирин үрдүк үөрэҕин кыһаларыгар 6115 бүддьүөт миэстэтэ арылынна, ити былырыыҥҥытааҕар тыһыынча кэриҥинэн элбэх. Бу туһунан Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата иһитиннэрдэ.
Өрөспүүбүлүкэ территориятыгар 6 үрдүк уонна 42 орто үөрэх кыһалара бааллар. Үөрэҕирии уонна наука миниистирэ Ирина Любимова иһитиннэрбитинэн, гуманитарнай уонна медицинскэй  хайысхалаах идэлэргэ киирээччи ахсаана элбиир. 
Быйыл 7900 оскуоланы бүтэрээччилэртэн 77%-ра өрөспүүбүлүкэ территориятыгар баар үрдүк үөрэх кыһаларын бүддьүөт миэстэлэригэр киирэр кыахтанна. 
Орто профессиональнай үөрэхтээһин туһунан этэр буоллахха, быйыл өрөспүүбүлүкэ орто үөрэҕин кыһаларыгар саҥа идэлэр хайысхалара арыллыбыт, ол иһигэр химическэй холбоһуктар аналитическай хонтуруолларын технологията. Быйыл барыта орто үөрэх кыһаларыгар 6700 тахса бүддьүөт миэстэтэ көрүлүннэ.
Үөрэх кыһаларыгар докумуоннары тутуу бэс ыйын 20 күнүттэн саҕаланар. Оскуоланы бүтэрээччилэр дойду үрдүнэн баар судаарыстыбаннай үрдүк үөрэх кыһаларыгар уонна филиалларыгар докумуоннарын дистанционнай көрүҥүнэн ыытыахтарын уонна үөрэххэ туттарсыы бары түһүмэхтэрин онлайн пуорманан кэтиэхтэрин сөп. Докумуоннары тутуу судаарыстыбаннай өҥөлөр портал «Поступление в вуз онлайн» суперсервиһын нөҥүө ыытыллар. Урут ити сервис бүддьүөт миэстэлэргэ эрэ киирэргэ туттуллар буоллаҕына, быйыл бүддьүөтү таһынан, целевой уонна чэпчэтиилээх миэстэлэргэ киирээччилэри кытта эмиэ үлэлиир.
Манна даҕатан эттэххэ, абитуриеннарга көмөлөһөр өрөспүүбүлүкэтээҕи штаб «итии линията» үлэтин сөргүтэр, ыйытыктары 8 (4112) 50-60-44 төлөпүөнүнэн биэриэххэ сөп.