Өрөспүүбүлүкэтээҕи саахымат конгреһын кыттыылаахтара кэллилэр

Саахымат конгреһын кыттыылаахтарын Хаҥалас улууһун Чапаево сэлиэнньэтигэр баар Аччыгый академия үөрэтэр-лабораторнай куорпуһун уопсайыгар олортулар. Манна конгресс сүрүн тэрээһиннэрэ ыытыллыахтара.

Бастакы бэрэсидьиэн Михаил Николаев 85 сааһыгар анаммыт өрөспүүбүлүкэтээҕи саахымат конгреһа ахсынньы 4-14 күннэригэр ыытыллар. Манна 150-тан тахса киһи кыттара былааннанар.

«Конгресс бырагырааматыгар гроссмейстерскай сессия, Михаил Николаев бирииһигэр XVII-с Саахымат олимпиадата, норуоттар икки ардыларынааҕы онлайн турнир, төгүрүк остуол, региоҥҥа саахымат спордун сайыннарыы боппуруостарынан конференция, педагогогтарга, тренердэргэ, саахымат куруһуоктарын уонна секцияларын салайааччыларыгар куурустар, судьуйалар семинардара, маастар-кылаастар уо.д.а. тэрээһиннэр киирэллэр», — диэн федерацияҕа иһитиннэрдилэр.

Конгресс чаҕылхай түгэнинэн дойду аатырбыт саахыматчыттара, норуоттар икки ардыларынааҕы  таһымнаах гроссмейстердар Антон Шомоев уонна Данил Павлов кэлэллэрэ буолар.