Өрөспүүбүлүкэтээҕи национальнай художественнай музейга быыстапка аһылынна

Киин куорат төрүттэммитэ 389 сылын көрсө өрөспүүбүлүкэтээҕи национальнай художественнай музейга «Регион 14» диэн быыстапка аһылынна. Ол туһунан тэрилтэ пресс-сулууспата иһитиннэрдэ. 
«„Регион 14“ бырайыак көрөөччү болҕомтотугар Сибиир кырдьаҕас куораттарыттан биирдэстэрэ – Дьокуускай куорат уобараһын дьүһүйбүт саха маастардарын оҥоһуктарын таһаарда.  Куорат төһө даҕаны историческай дьүһүнүн уонна былыргы архитектура эбийиэктэрин сүтэрбитин да иһин, худуоһунньуктар уулуссалары, тэрилтэлэри, саҥа тутуулары, ааһар дьону да көрөн айар тыыннара аһыллан күүрээннээхтик үлэлииллэр», – диэн этиллэр иһитиннэриигэ.
Ити курдук, экспозиция киинигэр куорат тиэмэтигэр уонна индустриальнай көстүүгэ анаммыт үлэлэр – Афанасий Осипов «Окраина города Якутска» (1997), «На окраине города» (1999) уонна Петр Ласс «Якутск строится» (1970) хартыыналара  бааллар. 
«Регион 14» быыстапка музей иккис уонна үһүс этээстэригэр алтынньы 10 күнүгэр диэри үлэлиир.