Өрөспүүбүлүкэ сиригэр-уотугар ойуур баһаардарынан ыксаллаах быһыы-майгы олохтонно

Бэс ыйын 11 күнүттэн Дьокуускай куоракка уонна өрөспүүбүлүкэ кэккэ улуустарыгар ойуур баһаардарынан сибээстээн ыксаллаах быһыы-майгы биллэрилиннэ.
Санатар буоллахха, ыам ыйын 6 күнүгэр СӨ Бырабыыталыстыбатын уурааҕынан ойуур баһаарыттан сэрэхтээх буолуу эрэсиимэ олохтоммута.
Онтон бэс ыйын 11 күнүттэн Ил Дархан ыйааҕынан Алдан, Амма, Дьааҥы, Бүлүү, Үөһээ Бүлүү, Кэбээйи, Өлүөхүмэ, Муома, Мэҥэ Хаҥалас, Нерюнгри, Нам, Сунтаар, Орто Халыма, Томпо, Таатта, Хаҥалас, Уус Алдан оройуоннарыгар уонна Дьокуускай куоракка ыксаллаах быһыы-майгы эрэсиимэ олохтонно. 
Бэлиэтээн эттэххэ, сыл саҕаланыаҕыттан ойуурга уоттан сэрэхтээх буолуу быраабылатын кэһии 80 түбэлтэтэ бэлиэтэннэ. 
ЫБММ министиэристибэтин Саха сиринээҕи салаатын пресс-сулууспата иһитиннэрэринэн, сезон саҕаланыаҕыттан 145 тыһ. гектар иэннээх сиргэ 170-тан тахса ойуур баһаара бэлиэтэммит. Бэс ыйын 13 күнүнээҕи туругунан Томпо оройуонун нэһилиэнньэлээх пууннарын уонна экономика эбийиэктэрин уоттан харыстыыр аналлаах Арассыыйа ЫБММ Бе-200 амфибия-сөмөлүөтэ үлэлиир. Авиалесоохрана чахчытынан, бу күҥҥэ өрөспүүбүлүкэ сиригэр-уотугар уопсайа 100 тыһ. гектардаах сиринэн 50 ойуур баһаара күүдэпчилэнэр. Ордук уустук балаһыанньа Томпо, Кэбээйи, Алдан, Нерюнгри уонна Өлүөхүмэ оройуоннарыгар турар, манна 36 бааһар 96 тыһ. гектар сиринэн тайыыр. 
«Нэһилиэнньэлээх пууннарга куттал суоһаабат. Кураанах этиҥнэр содулларыгар суукка иһигэр 9 ойуур баһаара эбилиннэ. Уоту кытта охсуһууга 82 киһи эбии туруорулунна», - диэн иһитиннэрэр ЫБММ Саха сиринээҕи салаатын начаалынньыга Павел Гарин.