Өрөбүллэргэ оптуобустар сылдьыбаттар, маҕаһыыннар сабыллаллар
Өрөспүүбүлүкэ салалтатын уонна Роспотребнадзор Саха сиринээҕи салаатын бэс ыйын 4 күнүгэр туруорбут соруктарыгар олоҕуран, Дьокуускай куорат баһылыга Сардана Авксентьева COVID-19 утары эбии миэрэлэри киллэрэр дьаһалы таһаарда.
Баһылык дьаһалыгар олоҕуран, бэс ыйын 6 уонна 7 күннэригэр, толору дезинфекция ыытылларынан сибээстээн, оптуобустар сырыылара тохтуур.
Куорат бары тэрилтэлэрин, офистарын салалталара бэс ыйын 7 күнүгэр толору дезинфекцияны ыытар эбээһинэстэнэллэр.
Маны таһынан, хаһаайыстыбаннай маҕаһыыннар, ону сэргэ кууһунан атыылыыр атыы-эргиэн базалара бэс ыйын 6 күнүгэр 00.00 чаастан, бэс ыйын 8 күнүн сарсыарда 08.00 чааһыгар диэри сабыллан толору дезинфекцияҕа барыахтара. Бэс ыйын 6 күнүгэр күнүс 16.00 чаастан, бэс ыйын 8 күнүн сарсыарда 08.00 чааһыгар диэри ас-үөл маҕаһыыннара сабыллаллар.
Бэс ыйын 6-7 күннэригэр Култуура уонна сынньалаҥ паарката сабыллар.
Бүгүҥҥүттэн Дьокуускай куорат дьаһалтатын уонна бары муниципальнай тэрилтэлэрин дьиэлэригэр толору дезинфекция ыытыллар. Куорат хаһаайыстыбатын эксплуатациялыыр сулууспа оптуобус остонуопкаларын, оҕо балаһааккаларын, тротуардары, элбэх кыбартыыралаах дьиэлэр подъезтарын уонна да атын уопсастыбаннай сирдэри, ол иһигэр Сынньалаҥ уонна култуура пааркатын сирин-уотун дезинфекциялыыр суурадаһынынан обработкалааһыны саҕалаата.
Сонуннар
Ордук ааҕаллар
