Өрөбүл күннэргэ үгэс буолбут оскуола дьаарбаҥката саҕаланар

Атырдьах ыйын 7 күнүттэн балаҕан ыйын 5 күнүгэр диэри Комсомольскай болуоссакка үгэс буолбут оскуола дьаарбаҥката саҕаланар. 2021-2022 үөрэх дьылыгар бэлэмнэнэн канцелярскай табаардар, оскуолаҕа кэтэр пуорма, атах таҥаһа уонна да атын үөрэххэ наадалаах табаардар баар буолуохтара.
СӨ предпринимательствоҕа, атыыга уонна туризмҥа Министиэристибэтин иһитиннэриитинэн, атырдьах ыйын 4 күнүнээҕи туругунан кыттыан баҕалаах предпринимателлэртэн 114 сайаапка киирбит. 
Дьаарбаҥка чэрчитинэн аһымал уонна экологическай аахсыйалар ыытыллыахтара. Атырдьах ыйын 20 күнүттэн 29 күнүгэр диэри «Помоги пойти в школу» аһымал аахсыйаҕа ким баҕалаах – атыылааччылар да, атыылаһааччылар да кыттыахтарын сөп. Хомуллубут оскуолаҕа туттар табаардар тиийиммэт уонна элбэх оҕолоох ыалларга көмө быһыытынан бэриллиэхтэрэ. 
Дьаарбаҥка саҕаланыаҕыттан бүтүөр диэри «Собираемся в школу с заботой о природе» макулатура хомуйааһыныгар экологическай аахсыйа ыытыллыа. Тэрээһин кыттыылаахтара кумааҕыны аҕалан туттарыахтара. 
Коронавируснай инфекцияны тарҕаппат сыалтан, мааска кэтэр, дистанцияны  тутуһар, дезинфекциялыыр сириэстибэлэри туттар эрэсиим күүһүрүө.