Проспект сотору аһыллыаҕа

Сэтинньи 6 күнүттэн Ленин проспегын Аммосов уонна Октябрьскай уулуссалары кытта быһа охсуһууларынан айанныахха сөп буолла.

“Главстрой” МХТ иһитиннэрбитинэн, Кулаковскай уулуссатыттан Курашов уулуссатыгар диэри кэрчиккэ светофордары уонна сырдатыы линиятын тардыы бара турар.

“Барыта түһүмэҕинэн холбонор, оҥоһуллар буолан, тырааныспар сырыытын чэпчэтэр сыаллаах, суол икки учаастагын болдьоҕун иннинэ арыйдыбыт. Атын учаастактарга  үлэ ситэн истэҕин аайы утары арыйан иһиэхпит”, – диэтэ “Главстрой” МХТ суолу тутууга салаатын салайааччыта Владимир Макаров.

Ленин проспегар “Куттала суох уонна хаачыстыбалаах суоллар” национальнай бырайыак чэрчитинэн улахан өрөмүөн ыытылла турарын санатабыт. Сэтинньи 14 күнүгэр диэри суолу толору арыйар былааннаахтар.