Промышленнай уокурукка хаһааҥҥытааҕар даҕаны элбэх суол оҥоһуллаары турар

Бэҕэһээ, тохсунньу 31 күнүгэр, баһылык Евгений Григорьев Промышленнай уокурук олохтоохторун иннигэр отчуоттаата.

Евгений Григоьев 2023 сыл бэлиэ түгэннэринэн дойду бэрэсидьиэнэ Владимир Путин Дьокуускай куорат 2030 сылга диэри сайдыытын маастар-былаанын өйөөбүтүн, бу маастар-былааҥҥа киирбит 90-ча араас бырайыагы олоххо киллэрии өрөспүүбүлүкэ киин куоратын атын, үрдүк таһымҥа таһаарар аналлааҕын , итиэннэ Куорат дуумата Дьокуускай куорат 2032 сылга диэри социальнай-экономическай сайдыытын былаанын бигэргэппитин ааттаата.

«Куттала суох уонна хаачыстыбалаах суоллар» национальнай бырайыагынан 2023 сылга уокурукка Бабушкин уулуссатыгар Сэбиэскэй Аармыйа 50 сылга уулуссаттан Очиченко уулуссатыгар диэри уонна Челюскин уулуссатыгар Сэбиэскэй Аармыйа 50 сыла уулуссаттан Беринг уулуссатыгар диэри кэрчиктэргэ хапытаалынай өрөмүөн ыытыллыбыт. 2024 сылга маннык өрөмүөн Сэбиэскэй Аармыйа 50 сыла уулусса Кальвица уулуссатыттан Бабушкин уулуссатыгар диэри кэрчигэр (2025 сылга түмүктэнэр), Богдан Чижик уулуссатын Богатырев уулуссатыттан Кальвица уулуссатыгар диэри кэрчигэр (2026 сылга түмүктэнэр), Леваневскай уулуссатыгар Сэбиэскэй Аармыйа 50 сыла уулуссаттан Кирсанова уулуссатыгар диэри кэрчигэр (2025 сылга түмүктэнэр), Рихард Зорге уулуссатыгар, Речниктэр уулуссаларыгар Бабушкин уулуссатыттан Рихард Зорге уулуссатыгар диэри кэрчиккэ ыытыллар.

2023 сылга Сэбиэскэй Аармыйа 50 сыла, 23 уонна Богдан Чижик, 20/2 аадырыстарга спорт балаһааккалара тутуллубуттар. 2024 сылга Сэбиэскэй Аармыйа 50 сыла, 23 аадырыска футбол хонуута тутуллаары турар.

Өрөспүүбүлүкэтээҕи аадырыстаах бырагырааманан уокурукка 118  хаарбах туруктаах дьиэттэн 347 киһи көһөрүллүбүт, Бабушкин, 12/1, Сэбиэскэй Аармыйа 50 сыла, 32, Дзержинскэй, 40/4, 50 аадырыстарга түөрт дьиэ көтүрүллүбүт. Муниципальнай бырагырааманан 3 дьиэттэн 4 киһи көһөрүллүбүт,  Бестужев-Марлинскай, 16, Ф. Попов, 4 уулуссаларыгар икки дьиэни тутааччы көтүрбүт. 2024 сылга өрөспүүбүлүкэтээҕи аадырыстаах бырагырааманан 22 хаарбах дьиэттэн 73 киһи саҥа дьиэҕэ көһөөрү олорор.

Промышленнай уокурукка 2023 сылга 13 №-дээх оскуолаҕа хапытаалынай өрөмүөн ыытыллыбыта, 10 №-дээх оскуолаҕа модульнай спорт саалата үлэҕэ киирбитэ, «Креативнай кластер» эбийиэк арыллыбыта.

Тиэргэни тупсарыы быйылгы былааныгар Кальвица, 7/1, 9/1, Бестужев-Марлинскай, 22 тиэргэннэрэ киирэн тураллар.

Баһылык отчуотун кэнниттэн олохтоохтор уокурукка култуура-сынньалаҥ киинэ наадатын, спорт балаһааккалара тиийбэттэрин, чааһынай секторга бөх тоҕор миэстэлэри тэрийэр оруннааҕын, тиэргэни тупсарыы, Очиченко уулуссатыгар баар приюту көрүү-истии туһунан санааларын эттилэр.

Некрасов уул., 4/2, Рихард Зорге уул., 11/1 дьиэлэрин мөлтөх туруктарын, куорат экологиятыгар ГРЭС алдьатыылаах сабыдыалын, оптуобустар интервалларын, 1 №-дээх оптуобуһу Өрүс пордугар киллэрэн туран урукку схематыгар төнүннэрии туһунан этиилэр эмиэ киирдилэр.

Уокурук олохтоохторо маны сэргэ 2 №-дээх Оҕо спорт оскуолатын эркинэ, Кржижановскай уулуссата хапытаалынай өрөмүөҥҥэ наадыйалларын бэлиэтээтилэр, «Банковская» тохтобулга сылаас павильон туруорары көрдөстүлэр.