Пригороднай бөһүөлэк Олохтоох дьаһалта отчуотун ылынна

Тохсунньу 23 күнүгэр баһылык Евгений Григорьев Пригороднай бөһүөлэк олохтоохторун иннигэр отчуоттаата. 
2022 сылга ыытыллыбыт биир баараҕай үлэнэн 12 №-дээх оскуолаҕа 326 миэстэлээх салҕааһынын тутуута буолар. Эһиил оскуолаҕа бэйэтигэр хапытаалынай өрөмүөн былааннанар. 
«Куттала суох уонна хаачыстыбалаах суоллар» бырагырааманан 1,7 км усталаах Центральнай уулусса өрөмүөнэ ыытылынна, 2023-24 сылларга «Хочо» СОТ муостаттан эргииргэ диэри оҥоһуллара былааннанар. 
Покровскайдыыр суол 7 км саҥа спорт балаһаакката үлэҕэ киирбитэ. Аны нэһилиэнньэ көрдөһүүтүнэн элбэх функиялаах спорт киинин бырайыак-смета докумуона оҥоһулла сылдьар. Итини сэргэ кэнэҕэһин ДСК оройуонугар сабыылаах каток баар буолуон сөп. 
Бөһүөлэк олохтоохторугар дьоһун суолталаах эбийиэгинэн Центральнай уулуссаҕа тутуллубут сылаас тохтобул буолар. Хомойуох иһин, саҥа тохтобулу алдьата сатааһын түгэннэрэ тахсыбытынан олохтоохтор кэтээн көрүү камератын туруорар наадатын этэллэр. 
Олохтоохтор көҕүлээһиннэринэн «Лена» түөлбэҕэ сайыҥҥы уу турбата тардыллыбыта, 2023 сылга маннык үлэ «Фаза», «Этна», «Так Мак» СОТтарга былааннанар. 
Отчуот кэнниттэн баһылык нэһилиэнньэ ыйытыыларыгар хоруйдаата. Олохтоохтор 103 №-дээх маршрут сырыытын уларытары, 13 №-дээх маршруту сөргүтэри, КВД тохтобулугар светофор турара наадатын, халаан ылар сир учаастактарын о.д.а. ыйыталастылар. Набережнай, Озёрнай уулуссалар уонна чугастааҕы СОТтар олохтоохторо «Сахатранснефтегаз» үбүлээһин суоҕунан сэттис сылын гааһы киллэрэри аккаастыырын этиннилэр.